काठमाडौँ प्रधानमन्त्री पुष्पकमल दाहाल ‘प्रचण्डको निर्देशनलगत्तै नेपाल प्रहरी प्रधान कार्यालयले देशभरका ७७ वटै जिल्ला तथा मातहतका प्रहरी युनिटलाई विपद् व्यवस्थापन, खोज तथा उद्धारलगायत कार्यमा लागन सर्कुलर पठाएको छ।
प्रहरी महानिरीक्षक वसन्तबहादुर कुँवरले बिहान प्रधानमन्त्रीबाट निर्देशन आए लगत्तै मातहतका सबै युनिटहरुमा सर्कुलर जारी गरेको जानकारी दिए। उनका अनुसार विभिन्न जिल्लामा बाढीपहिरोले धनजनको क्षति भएको र केही मानिस बेपत्ता भएको जानकारी आएको बताउँदै प्रभावित क्षेत्रमा खोज तथा उद्धारमा प्रहरी टोली सक्रियताका साथ लागिरहेको छ।
गृह मन्त्रालयका अनुसार मकवानपुरलगायत केही जिल्लामा मानवीय क्षति भएको छ। मकवानपुरमा एक जनाको मृत्यु र छ बेपत्ता भएका छन्। पहिलो प्राथमिकता मानवीय सुरक्षा रहेको जनाउँदै गृह मन्त्रालयका प्रवक्ता नारायणप्रसाद भट्टराईले क्षतिको विवरण आइनसकेको बताए। अहिले उद्धारमै सबैको ध्यान रहेको उनको भनाइ छ।
अन्य धेरै जिल्लाका नागरिकलाई वर्षाले प्रभावित बनाएको छ। बिहान काठमाडौँ उपत्यका सहितका क्षेत्रमा डुवानको समस्या पनि देखिएको थियो। पहिरोका कारण नारायणगढ–मुग्लिन सडक, कालीगण्डकी कोरिडोर, मध्यपहाडी राजमार्ग, कान्ति लोकथप, मदनभण्डारी मार्गलगायत धेरै राजमार्गमा सवारीसाधन आवागमन प्रभावित भएको छ
