पर्साको पोखरिया नगरपालिकामा बिहिवार भएको कर्मचारी र जनप्रतिनिधिबीच मैत्रीपूर्ण फुटबल प्रतियोगिता कर्मचारी टिमले जितहासिल गरेको छ ।
मैत्रीपूर्ण फुटबल प्रतियोगितामा जनप्रतिनिधिको तर्फबाट नगरप्रमुख प्रदुमन चौहान कप्तान रहेका थिए भने कर्मचारीको तर्फबाट प्रमुख प्रशासकीय अधिकृत अजय कुमार श्रीवास्तव रहेका थिए ।
फुटबल प्रतियोगितामा १–१ गोलको बराबरी गरेका थिए । तर,पेनाल्टी सुटमा कर्मचारी टीमद्वारा १ गोल गरेपछि २–१ ले जनप्रतिनिधी टिमलाई हराउँदै कर्मचारी टिम विजय हासिल गरेको छ ।
सुरुमा कर्मचारी टिमको तर्फबाट मनोजप्रसाद पटेलले १ गोल गरेका थिए भने जवाफमा जनप्रतिनिधिको टिमबाट वडा नम्बर ६ का वडाध्यक्ष सिमानन्द चौहानले एक गोल गरेर खेलमा बराबरी गरेका थिए ।
पेनाल्टी सुटमा कर्मचारी टिमको तर्फबाट प्रमुख प्रशासकीय अधिकृत अजय श्रीवास्तवले एक गोल गरेर आफ्नो टिमलाइ जित दिलाएको पोखरिया नगरपालिकाका जिन्सी शाखा प्रमुख मनोज साहले जानकारी दिए ।
जनप्रतिनिधि र कर्मचारीबिच आपसी भाइचारा र मित्रवत सम्बन्ध स्थापना गर्न यस्ता प्रतियोगिताले सहयोग पुग्ने विश्वास लिइएको छ । प्रतियोगितामा विजेता र उपविजेता टिमलाई पुरस्कार कप, मेडल प्रदान गरिएको थियो ।
