जनकपुरधाम-मधेश प्रदेश सरकारले सार्वजनिक गरेको बजेट माथि आज देखि छलफल शुरु हुने भएको छ ।
अर्थमन्त्री भरतप्रसाद साहले जनाए अनुसार शुक्रबार बजेटमाथि छलफल सुरु हुने छ । प्रदेशका मुख्यमन्त्री सतीशकुमार सिंहले बजेट पुनर्लेखन गर्ने पटक–पटक बताए पनि असार १ गते अर्थमन्त्री साहले प्रदेश सभामा प्रस्तुत गरेको बजेट यथास्थितिमा नै छलफलका लागि टेबुल हुने छ । ‘संसदीय कानुन र व्यवहार अनुसार संसदमा प्रस्तुत भएको बजेट यथास्थितिमा नै एक पटक पास हुनुपर्छ’ मन्त्री साहले भने, बजेटमा देखिएका त्रुटिहरुलाई पुरक बजेट ल्याएर सम्बोधन गरिनेछ ।
संसदमा प्रस्तुत भइसकेको बजेट पुनर्लेखन हुने प्रावधान नभए पनि मुख्यमन्त्री सिंहले सर्वदलीय बैठकमा बजेटमा व्यापक त्रुटि भएको र ह्याक गरी अनधिकृत रुपमा योजना प्रविष्ट भएकाले पुनर्लेखन गरी प्रदेश सभामा प्रस्तुत गरिने प्रतिवद्धता जनाएका थिए । विपक्षी दलहरुले पनि बजेट पुनर्लेखन गरी प्रदेश सभामा पेश गर्न मुख्यमन्त्री सिंहलाई ज्ञापन बुझाएका थिए । उनीहरुले ह्याक गर्नेहरुको छानविन गरी कारबाही गर्नुपर्ने र बजेट समानुपातिक ढंगले वितरण गर्नुपर्ने माग राखेका छन् ।
सरकारले विपक्षी दलहरुको मागको विषयमा केही बोलेको छैन । प्रदेश सभामा वाचन गरिएको ४३ अर्ब ८९ करोड २१ लख ७० हजार रुपैयाँको बजेटमाथि नै छलफल हुनेछ । बजेट प्रस्तुत भएको ठ्याक्कै २१ औं दिन छलफलमा लगिएको छ । प्रदेश सभा सचिवालयले शुक्रबार बिहान ११ बजे बस्ने प्रदेश सभाको बैठकमा आर्थिक वर्ष २०८१/०८२ को बजेटमाथि छलफल हुने कार्यसुची रहेको जनाएको छ । तर विपक्षी दलहरुले बजेटको छलफल बहिष्कार गर्ने जनाएको छ ।
जनता समाजवादी पार्टी(जसपा)नेपालका प्रमुख सचेतक रामअशिष यादवले बजेट वक्तव्यको छलफलमा सहभागी नहुने बताएका छन् । ‘हामीले सरकारलाई बुझाएको ज्ञापन पत्रलाई सम्बोधन नगरिएकोले बजेट वक्तव्यमाथिको छलफलमा भाग लिने छैनौ’ उनले भने, बजेट ह्याक गर्नेमाथि छानबिन गर्न समिति गठन हुनुपर्ने, ६४ वटै निर्वाचन क्षेत्रमा सन्तुलित ढंगले बजेटको वितरण हुनु पर्ने र बजेटको रातो किताब पुनर्लेखन हुनुपर्ने माग सम्बोधन हुनुपर्छ । सरकारले बजेट पुनर्लेखन नगरेसम्म अधिकांश सांसदहरुले बजेट वक्तव्यमाथिको छलफलमा सहभागी नहुने उनले दाबी गरे ।
