कलैया –

बाराको कलैया उपमहानगरपालिका वडा नम्बर १४ बघवन टोलमा गत जेठ २९ गते भएको ५० वर्षीय नन्दु राउत कुर्मीको हत्यामा संलग्न मुख्य अभियुक्त उमेश जैसवालसहित पाँच जनालाई बारा प्रहरीले पक्राउ गरेको छ।

नन्दु राउत कुर्मीका २६ वर्षीय छोरा दिपेन्द्र पटेलले दिएको जाहेरीका आधारमा प्रहरीले अनुसन्धान अगाडि बढाएको थियो। प्रहरीले जेठ ३० गते साँझ बघवन टोलबाट दिगम्बर प्रसाद जैसवाललाई पक्राउ गरेको थियो। असार ४ गते राति १२:०५ बजे कलैया वडा नम्बर ५ स्थित सागर लामिछानेको घरबाट मुख्य अभियुक्त उमेश जैसवालकी श्रीमती रन्जु देवी जैसवाललाई लुकीछिपी बसेको अवस्थामा पक्राउ गरिएको थियो।

सोही दिन वीरगन्ज महानगरपालिका वडा नम्बर १ शान्ति टोलस्थित बसिर मियाको घरबाट उमेश जैसवालका छोराहरू सुमित जैसवाल र सुजित कुमार जैसवाललाई पक्राउ गरिएको थियो। मुख्य अभियुक्त उमेश जैसवाललाई भने असार ५ गते राति ९:१५ बजे बाराको बिश्रामपुर गाउँपालिका वडा नम्बर ४ खुदिया टोलबाट पक्राउ गरिएको बारा प्रहरीले जनाएको छ।

घटना जेठ २९ गते साँझ ६:१५ बजे उमेश साहको राइस मिल्सअगाडि भएको थियो, जहाँ नन्दु राउत कुर्मीमाथि कुटपिट भएको थियो। कुटपिटबाट गम्भीर घाइते भएका कुर्मीको उपचारका क्रममा मृत्यु भएको थियो। प्रहरीलाई घटनाको करिब एक घण्टापछि मात्र जानकारी प्राप्त भएको थियो।

प्रारम्भिक अनुसन्धानअनुसार, मृतक नन्दु राउत कुर्मीकी नातिनी र करैयामाई गाउँपालिका वडा नम्बर ७ का गौतम पासवानबीचको भेटघाटलाई लिएर विवाद सुरु भएको थियो। विवादका क्रममा मृतककी श्रीमतीले उमेश जैसवालका कान्छा छोरा सुजित कुमार जैसवाललाई हातपात गरेपछि रिसइबीका कारण उमेश जैसवालसहितका व्यक्तिहmले कुर्मीमाथि कुटपिट गरेका थिए। घाइते कुर्मीलाई अस्पताल लगिएको थियो, तर उनको मृत्यु भएको घोषणा गरियो।

बारा प्रहरीले यस घटनामा थप अनुसन्धान जारी राखेको र कानुनबमोजिम कारबाही अगाडि बढाउने जनाएको छ।