वीरगन्ज-

भारत–नेपाल सीमाको रक्सौलस्थित मितेरी पुल नजिकैको १० गज्जा क्षेत्रमा भारतीय सीमा सुरक्षा बल (एसएसबी) ले अस्थायी चेकपोस्ट निर्माण शुरू गरेको छ। नेपालको प्रमुख प्रवेशद्वार र औद्योगिक नगरी वीरगन्ज–रक्सौलमा भारतीय सशस्त्र सीमा बलले एकतर्फी रूपमा चेकपोस्ट बनाउन थालेको हो।

भारतीय सीमा बलको ४७औं बटालियनका सहायक कमान्डेन्ट दीपांशु चौहानको नेतृत्वमा प्रहरी निरीक्षक कोमल सिंह र अरबिन्द कुमार यादवको कमान्डमा मितेरी पुलको दायाँ–बायाँ पैदल हिँड्ने बाटोमा पुलको जग्गा अतिक्रमण गरी निर्माण कार्य भइरहेको छ। भारतीय स्रोतका अनुसार चेकपोस्टमा ५०–६० जवान तैनाथ गरिने योजना छ।

स्थानीयवासीले यो कदमले दुई देशबीचको मित्रता र सद्भावमा असर पर्ने भन्दै चिन्ता व्यक्त गरेका छन्। एक स्थानीयले भने, “खुला सीमामा यस्ता एकपक्षीय गतिविधिले विश्वासमाथि आघात पुर्‍याउँछ।” चेकपोस्टले भारत–नेपाल जनताबीचको ऐतिहासिक सम्बन्धमा दूरी बढ्ने आशंका गरिएको छ।

यसअघि पनि रक्सौलमा भारतीय पक्षले यस्तै चेकपोस्ट बनाएको थियो, तर स्थानीयको विरोधपछि हटाइएको थियो। हालको निर्माणले पुनः विवाद निम्त्याउने सम्भावना छ।