वीरगन्ज-

मधेस प्रदेश, विशेष गरी पर्सा र बारामा पानीको संकट गहिरिँदै गएको छ। सिँचाइ र पिउने पानीको अभावले किसान र स्थानीयवासी कठिनाइमा छन्। यस्तो प्राकृतिक विपदमा जनमत पार्टी पर्साले भने ‘कपटी चाल’ शैलीको राजनीति गरेको आरोप लागेको छ। घण्टाघरमा आयोजित विरोध प्रदर्शनमा वीरगञ्ज महानगरका मेयर राजेशमान सिंह, केन्द्र सरकारका खानेपानी मन्त्री प्रदीप यादव र प्रदेशसभा सदस्यहरूलाई जिम्मेवार ठहराउँदै नाराबाजी गरियो, तर आफ्नै पार्टीको नेतृत्वमा रहेको मधेस प्रदेश सरकार र मुख्यमन्त्री सतीश कुमार सिंहविरुद्ध कुनै शब्द उच्चारण गरिएन।

जनमत पर्साले बोरिङ जडानमा विभेद भएको दाबी गरेको छ, भन्दै कि बोरिङहरू कार्यकर्ताहरूको घरनजिक मात्र जडान गरिएको छ। विपदको बेला सरकारलाई सहयोग गर्नुपर्नेमा यस्तो राजनीति गर्नुले जनमत पार्टीको दोहोरो चरित्र उजागर भएको छ। संकट समाधानमा सबै तहका सरकार जिम्मेवार छन्, तर स्थानीय र केन्द्र सरकारलाई मात्र निशाना बनाएर आफ्नो सरकारलाई जोगाउनुले जनताको विश्वासमाथि प्रश्न उठ्छ।

विपदमा राजनीतिक दलहरूले नागरिकको हितमा एकजुट भएर काम गर्नुपर्छ, न कि विभेदकारी व्यवहार वा स्वार्थको खेल खेल्नुपर्छ। जनमतको यो कदमलाई आम नागरिकले ‘कपटी चाल’ को रूपमा बुझेका छन्, जसले संकट समाधानभन्दा राजनीतिक लाभ लिने प्रयास गरेको देखिन्छ।