वाशिंगटनले प्यालेस्टिनीहरू विरुद्ध इजरायली मानव अधिकार उल्लङ्घनको अनुसन्धानमा अल्बानीज विरुद्ध प्रतिवन्धहरूको घोषणा गरेको थियो ।

काठमाडौँ-

संयुक्त राष्ट्र मानव अधिकार विज्ञमाथि अमेरिकी प्रतिवन्ध अस्वीकार्य रहेको संयुक्त राष्ट्र प्रवक्ताले बताउनुभएको छ । संयुक्त राष्ट्र मानव अधिकार विशेष प्रतिवेदकहरूमाथि प्रतिवन्ध लगाउनु एक खतरनाक उदाहरण भएको उहाँको भनाइ छ ।

संयुक्त राष्ट्र महासचिव एन्टोनियो गुटेरेसका प्रवक्ता स्टेफेन डुजारिकले कब्जा गरिएको प्यालेस्टिनी भूभागमा मानव अधिकारको अवस्थाबारे संयुक्त राष्ट्र संघका विशेष प्रतिवेदक फ्रान्सेस्का अल्बानीजमाथि अमेरिकी प्रतिवन्धको प्रतिक्रियाका रुपमा यस्तो बताउनुभएको हो ।

वाशिंगटनले प्यालेस्टिनीहरू विरुद्ध इजरायली मानव अधिकार उल्लङ्घनको अनुसन्धानमा अल्बानीज विरुद्ध प्रतिवन्धहरूको घोषणा गरेको थियो । यी प्रतिवन्धहरू अमेरिकी राष्ट्रपति डोनाल्ड ट्रम्पले फेब्रुअरीमा हस्ताक्षर गरेको कार्यकारी आदेशपछि आएका हुन् ।

आदेशमा अन्तर्राष्ट्रिय फौजदारी अदालतले संयुक्त राज्य अमेरिका र इजरायललाई लक्षित गरी गरिएका अवैध र आधारहीन कार्यहरूको रूपमा वर्णन गरेकोमा दण्डात्मक कारबाहीलाई अधिकार दिएको थियो ।