जनकपुरधाम –
मधेश प्रदेशमा सरकारको नेतृत्व परिवर्तनबारे चर्को बहस चलिरहेका बेला मुख्यमन्त्री सतीशकुमार सिंहले सरकार छाड्ने कुनै योजना नरहेको प्रष्ट पारेका छन्। नेपाली कांग्रेसले आलोपालो नेतृत्वको सहमति भएको भन्दै सरकारको नेतृत्व दाबी गरे पनि सिंहले यस्तो सहमति नै नभएको दाबी गरेका हुन्।

हाल मधेश प्रदेशमा जनमत पार्टीको नेतृत्वमा नेकपा एमाले, नेपाली कांग्रेस र लोसपा सहभागी गठबन्धन सरकार सञ्चालन भइरहेको छ। संघीय तहमा भएको सहमति अनुसार एक वर्ष जनमत पार्टीलाई नेतृत्व दिएपछि ठूलो दललाई नेतृत्व दिने कुरा भएको कांग्रेस पक्षको दाबी रहे पनि मुख्यमन्त्री सिंहले उक्त दाबीलाई अस्वीकार गर्दै भने, “कांग्रेससँग आलोपालो सरकारको नेतृत्व गर्ने सहमति भएको छैन। मैले मुख्यमन्त्री बन्ने बेला कुनै सम्झौता गरेको छैन, न त राष्ट्रिय अध्यक्षले पनि।”

यसअघि जनमत पार्टी अध्यक्ष डा. सीके राउतले पनि सरकारको नेतृत्व दीर्घकालीन नहुने संकेत दिएका थिए। तर कांग्रेसका संसदीय दलका प्रमुख सचेतक कुमरकान्त झाले भने एमाले, कांग्रेस, जनमत र लोसपालगायत दलबीच गठबन्धन बैठकमै आलोपालो नेतृत्वको सहमति भएको दाबी गर्दै कांग्रेसको दाबी जायज रहेको बताए।

मुख्यमन्त्री सिंहले अहिले देखिएका असन्तुष्टिलाई “प्रदेशस्तरका केही नेताको असहमति मात्र” भन्दै सरकार स्थिर रहेको बताए। उनले बजेटबारे देखिएको विवादलाई समेत समाधान गरिएको दाबी गर्दै, “सानोतिनो त्रुटि सच्याउने गरी सर्वसम्मतिबाट बजेट पारित गरेका हौँ,” भने।

त्यस्तै, संघीय सरकारलाई उनले सुनकोशी–मेरिन डाइभर्सनमार्फत बागमतीसम्म पानी ल्याइदिन, चुरे क्षेत्र संरक्षण तथा सिँचाइ परियोजना अघि बढाउन, किसानका लागि बीउबिजन र मलखादको व्यवस्थासहित ठूलो प्याकेज घोषणा गर्न आग्रह गरे। तत्काल खानेपानी अभाव समाधानका लागि ट्यांकरमार्फत पानी वितरण भइरहेको र रेडबुकमा रहेका खानेपानीका योजना सञ्चालनमा ल्याइएको उनको भनाइ छ।

मधेश प्रदेशमा एक वर्ष पूरा भएको गठबन्धन सरकारले नेतृत्व परिवर्तन गर्ने कि निरन्तरता दिने भन्ने विषयमा दलहरूबीच अहिले पनि अन्तर्क्रिया जारी छ।