वीरगन्ज-
किरण साह पक्राउ प्रकरणमा वीरगन्ज महानगरपालिकाका नगर प्रमुख राजेशमान सिंहले झुठको सहारा लिएका छन्। वीरगन्जबाट सञ्चालित एक सञ्चार संस्थालाई दिएको अन्तर्वार्तामा किरण साहका परिवारको कुनैपनि सदस्य बिरामी भई अस्पताल भर्ना नभएको दाबी गर्दै नगर प्रमुख सिंहले वीरगन्जवासीलाई झुक्याएका छन्।
साहले राजनीतिक षड्यन्त्रका तहत संघ सरकारका खानेपानी मन्त्री प्रदीप यादव र आफू स्वयंलाई बदनाम गर्न स्टन्ट गरिएको आरोप लगाउँदै वीरगन्ज र देशका जनतासँग झुठो बोलेको तथ्य गोप्यखबरले पत्ता लगाएको छ। गोप्यखबर को टिमले किरण साह पक्राउ प्रकरणको छानबिन गर्दा नगर प्रमुख सिंहले दाबी गरेको भन्दा फरक तथ्यहरू फेला पारेको छ।
किरण साहका परिवारको कोहीपनि सदस्य अस्पतालमा भर्ना नरहेको नगर प्रमुखको भनाइबारे छानबिन गर्दा किरण साहकी बहिनी संजा कुमारी साहकी २ वर्षीया छोरी कृतीका साह र ३ वर्षीय छोरा आर्यन साह वीरगन्जको भेडियाहीस्थित नेशनल मेडिकल शिक्षण अस्पतालमा विगत एक सातादेखि भर्ना रहेको पत्ता लागेको छ। साहकी भतिजी कृतीका झाडापखालाको गम्भीर बिरामी भएकी कारण भदौं ११ गतेदेखि नै अस्पतालमा भर्ना भएकी छन् भने भतिज आर्यन खुट्टाको शल्यक्रिया र झाडापखालाका कारण अस्पतालमा भर्ना भएको गोप्यखबर ले पत्ता लगाएको छ।
नगर प्रमुख सिंहले सञ्चार माध्यमलाई दिएको अन्तर्वार्तामा वीरगन्जका सरकारीदेखि निजी अस्पतालका सबै झाडापखालासम्बन्धी बिरामीको तथ्यांक महानगरसँग दैनिक रुपमा अपडेट हुने गरेको र त्यसमा किरणका परिवारका कुनै सदस्य नरहेको असत्य जानकारी नागरिकलाई दिएका छन्।
भदौं ११ गते बुधबार झाडापखालाबाट गम्भीर बिरामी भएकी कृतीकालाई एनएमसीको आइसियुमा भर्ना गरिएको थियो। स्वास्थ्यमा सुधार भएपछि अहिले उनलाई आइसोलेशन वार्डमा राखी उपचार भइरहेको किरणका बहिनी ज्वाइँ शिव साहले गोप्यखबर लाई जानकारी दिनुभयो। उहाँले छोरा आर्यनको खुट्टा भाँचिएपछि उपचार गराउन बाराको निजगढबाट वीरगन्ज आएको र सोही क्रममा वीरगन्जको मुर्लीस्थित किरण बस्ने डेरामा बस्दा छोरा–छोरीले धाराको पानी खाएपछि दुवै जना झाडापखालाबाट गम्भीर बिरामी भएको बताउनुभयो।
“पहिले नै छोराको खुट्टा भाँचिएको थियो, त्यसपछि छोरा–छोरी दुवैमा झाडापखालाको समस्या भएपछि नेशनल मेडिकल अस्पतालमै भर्ना गराइयो। यही विषयलाई लिएर किरणले खानेपानी मन्त्री प्रदीप यादव र मेयर सिंहलाई फोन गरेका थिए,” शिव साहले जानकारी दिनुभयो।
किरणले फोन गरी मन्त्री र मेयरलाई “तपाईँहरूले जनतालाई पानी वितरण गर्दा पानी ठीक छ कि छैन भन्ने परीक्षण गर्ने कि नगर्ने?” भन्ने प्रश्न गर्दा थुनामा परेको उहाँको भनाइ छ।
पहिले भतिजा, पछि भतिजी र त्यससँगै किरणका ७३ वर्षीय पिता तुल्सी साह र आमा सावित्री साह पनि बिरामी भए। उनीहरूले मानसिक सन्तुलन गुमाउँदै मन्त्री र मेयरलाई फोन गरेर चर्को स्वरमा कुरा गरेको शिव साहको भनाइ छ। पिता तुल्सी साह र आमा सावित्री देवीलाई उपचारका लागि वीरगन्जको एड्भान्स अस्पताल लगिएको थियो। स्वास्थ्य सुधार भएपछि दुवैलाई मुर्लीस्थित डेरामा ल्याइएको उहाँले बताउनुभयो।
“सरकारको लगानीमा वितरण गरिएको पानी खानेयोग्य छ कि छैन भन्ने परीक्षण नगरी नागरिकको ज्यानसँग खेलवाड गर्नेहरूमाथि कार्यवाही हुनु पर्ने ठाउँमा मन्त्री र मेयरको जवाफदेहिताको खोजी गर्ने किरणलाई जेलमा हाल्नु कत्तिको न्यायोचित हो?” भन्ने प्रश्न शिव साहले उठाउनुभएको छ।
डेरामा बिरामी रहेका किरणका माता–पिताको हेरचाह गर्ने कोही छैन। “उनीहरूलाई केही भयो भने मन्त्री र मेयरले त्यसको जिम्मा लिन्छन् कि लिँदैनन्?” भन्ने प्रश्न पनि किरणका बहिनी ज्वाइँ शिव साहले गरेका छन्।
मन्त्री र मेयरलाई झर्केर कुरा गर्दा किरणमाथि मुद्दा चलाइन्छ तर किरणलाई दैनिक रूपमा मन्त्री र मेयरका समर्थकहरूले सामाजिक सञ्जालमा मानमर्दन गर्दा राज्यले कारबाही गर्ने कि नगर्ने भन्ने प्रश्न आम नेपाली जनतासमक्ष शिव साहले तेर्साउनुभएको छ।
बारा जिल्लाको कलैया उपमहानगरपालिका वडा नं. २६ सिस्वा महेशपुरमा जन्मिएकी किरण साह मात्र ८ कक्षा पढेकी भए पनि म्युजिक एल्बममा काम गर्दै माता–पिताको भरणपोषण गर्दै आएकी हुन्। उनका बहिनी ज्वाइँका अनुसार, किरणका दुई जना ठूला दाइ भए पनि माता–पिताको हेरचाह नगरेपछि किरण एक्लै जिम्मेवारी उठाउँदै आएकी थिइन्। अहिले उनलाई थुनामा राखेपछि उनका माता–पितालाई राज्यले कसरी हेर्ने भन्ने प्रश्न समाज अगाडि तेर्सिएको छ।
मन्त्री र मेयरलाई ज्यान मार्ने धम्की दिएको विषयमा खानेपानी मन्त्री यादवका पर्सनल असिस्टेन्ट (पीए) हरेन्द्र साहले दिएको निवेदनका आधारमा किरणलाई प्रहरीले पक्राउ गरेको हो। तर, किरणलाई अपमानित गर्दै सामाजिक सञ्जालमा दैनिक रूपमा मन्त्री र मेयरका समर्थकहरूले गरेका क्रियाकलापको लेखाजोखा राज्यले राख्छ कि राख्दैन भन्ने प्रश्न अहिले जनतामाझ ठडिएको छ।
