जनकपुरधाम –

अन्तरजातीय विवाह गरेर चर्चामा आएका कलाकार अभिनास झा उर्फ ‘कलकतियाबाली’की पत्नी अंशा सदा सोमबार राति आफ्नै घरमा मृत अवस्थामा फेला परेकी छिन्। गत माघ महिनामा विवाह बन्धनमा बाँधिएका झा दम्पतीले धार्मिक विधिपूर्वक गृह प्रवेश समारोह समेत सामाजिक सञ्जालमार्फत सार्वजनिक गरेका थिए। उनीहरू खुसी मुद्रामा देखिएका थिए।

धनुषा जिल्ला प्रहरी कार्यालयका प्रवक्ता डिएसपी वरुणबहादुर सिंहका अनुसार, जनकपुरधाम उपमहानगरपालिका–१२ र २० को बीचमा रहेको नोचापुरस्थित घरमा अंशा मृत अवस्थामा भेटिएकी हुन्। घटनाबारे सोमबार राति नै प्रहरीलाई जानकारी प्राप्त भएको थियो। प्रहरीले घटनास्थलमा पुगेर प्रारम्भिक अनुसन्धान सुरु गरेको छ र घरमा निगरानी बढाएको छ।

हालसम्म अंशाको माइती पक्ष घटनास्थलमा नआइसकेकाले कानुनी प्रक्रिया अघि बढाउन कठिनाइ भइरहेको प्रहरीले जनाएको छ। माइती पक्षको उपस्थितिपछि मात्र शवलाई पोष्टमार्टमका लागि पठाइनेछ। प्रारम्भिक अनुसन्धानका आधारमा यो आत्महत्या भएको हुन सक्ने अनुमान गरिएको छ, तर पोष्टमार्टमको प्रतिवेदन प्राप्त नभएसम्म कुनै निश्चित निष्कर्षमा पुग्न नसकिने डिएसपी सिंहले बताए।

घटनास्थलमा स्थानीयवासीको भीड लागेको छ भने अभिनास झा मिडियासँग बोल्न सक्ने अवस्थामा छैनन्। प्रहरीले घटनाबारे थप अनुसन्धान जारी राखेको छ। स्थानीय र सामाजिक सञ्जालमा यो घटनाले व्यापक चर्चा पाइरहेको छ।