काठमाडौं-
विश्वको सबैभन्दा ठूलो भिडियो साझेदारी प्लेटफर्म युट्युबले आफ्नो लोकप्रिय ‘ट्रेन्डिङ’ सेक्सन हटाउने निर्णय गरेको छ। आगामी केही साताभित्रै ट्रेन्डिङ पृष्ठ र ट्रेन्डिङ नाउ सूची बन्द गरेर नयाँ चार्ट-आधारित वर्गीकरण प्रणाली लागू गर्ने युट्युबले जनाएको छ।
कम्पनीका अनुसार, यो परिवर्तनले प्रयोगकर्ताहरूलाई विविध र स्पष्ट सामग्री खोज्ने अवसर प्रदान गर्नेछ। सन् २०१५ मा भाइरल सामग्रीलाई प्रोत्साहन गर्न सुरु गरिएको ट्रेन्डिङ सेक्सनको सट्टा अब “स्पेसिफिक चार्ट्स” नामक फीचर ल्याइनेछ। यसमा ट्रेन्डिङ म्युजिक भिडियो, साप्ताहिक टप पोडकास्ट शो, र ट्रेन्डिङ मुभी ट्रेलरजस्ता खण्डहरू समावेश हुनेछन्।
युट्युबले आफ्नो ब्लग पोस्टमा भनेको छ, “हामी चार्टमार्फत लोकप्रिय सामग्री हाइलाइट गर्नुका साथै व्यक्तिगत सिफारिसहरूबाट प्रयोगकर्ताका रुचिका भिडियो देखाउनेछौं। यसले नयाँ भिडियो खोज्ने प्रक्रियालाई अझ स्वाभाविक बनाउनेछ।”
यो परिवर्तनसँगै प्रयोगकर्ताहरूले ‘एक्स्प्लोर मेनु’, ‘क्रिएटर च्यानल्स’, र ‘सब्सक्रिप्सन फिड’ मार्फत गैर-व्यक्तिगत सामग्री हेर्न र ब्राउज गर्न सक्नेछन्। युट्युबका अनुसार, ट्रेन्डिङ सूची प्रयोगकर्ताको रुचिअनुसार बारम्बार परिवर्तन हुने भएकाले नयाँ प्रणाली अझ सूक्ष्म र उपयोगकर्ता-केन्द्रित हुनेछ।
कम्पनीले सामग्री सिर्जनाकर्ताहरूलाई उनीहरूको सामग्रीको लोकप्रियता मापन गर्न नयाँ टुल्स उपलब्ध गराउने प्रतिबद्धता पनि व्यक्त गरेको छ।
नेपालमा युट्युबको ट्रेन्डिङ सेक्सन विशेषगरी फिल्म ट्रेलर, म्युजिक भिडियो, र भ्लगिङ सामग्रीका लागि निकै लोकप्रिय थियो। ट्रेन्डिङ सेक्सन हटेपछि नयाँ चार्ट प्रणालीले कस्तो प्रभाव पार्छ, त्यो आगामी दिनमा देखिनेछ।
