वीरगन्ज –
नेपालीको खर्च गर्ने क्षमता कम हुँदै गएको भनाइलाई वीरगन्ज भन्सार कार्यालयको तथ्याङ्कले चुनौती दिएको छ। विश्वव्यापी आर्थिक मन्दीका कारण आम नेपाली जनताको आम्दानीमा संकुचन आएकाले खर्च गर्ने क्षमता घटेको भनाइलाई भन्सार कार्यालयले सार्वजनिक गरेको तथ्याङ्कले खण्डन गरेको हो।

नेपाल सरकारले खाद्यान्न, औषधि, इन्धनलाई अत्यावश्यक वस्तुको श्रेणीमा राखेको छ भने सौन्दर्य प्रसाधन, मदिरा, मोबाइल, टेलिभिजन, सवारीसाधनलगायतका वस्तुहरूलाई विलासिता वस्तुको श्रेणीमा वर्गीकृत गरेको छ।

विलासिता वस्तुको श्रेणीमा पर्ने सौन्दर्य प्रसाधनको आयात उल्लेख्य रूपमा बढेको तथ्याङ्कले उक्त भनाइलाई चुनौती दिएको हो। आर्थिक वर्ष २०८०/८१ को तुलनामा आर्थिक वर्ष २०८१/८२ मा सौन्दर्य प्रसाधनको आयात १० प्रतिशतले वृद्धि भएको छ।

अघिल्लो आर्थिक वर्षमा वीरगन्ज नाकामार्फत नेपालका लागि ४ अर्ब ९८ करोड रुपैयाँ बराबरको लिपस्टिक, श्याम्पु, परफ्युम, अनुहारमा लगाउने सौन्दर्य क्रीमलगायतका सामग्री आयात भएकोमा गत आर्थिक वर्षमा ५ अर्ब ४८ करोड रुपैयाँ बराबरको सौन्दर्य प्रसाधन आयात भएको वीरगन्ज भन्सार कार्यालयले जनाएको छ।

समीक्षा अवधिको तुलनामा गत आर्थिक वर्षमा ५० करोड रुपैयाँ बढी सौन्दर्य प्रसाधन आयात भएको भन्सार कार्यालयका सूचना अधिकारी अमित तिवारीले जानकारी दिनुभयो। उहाँका अनुसार अहिले देशभरका पालिकाले व्युटिसियन तालिम दिने काम गरिरहेका छन् र यसका कारण गाउँ–शहरमा नयाँ व्युटी पार्लरहरू खुल्दै गएका छन्। साथै महिलाहरू सौन्दर्यप्रति जागरूक भई प्रसाधनप्रतिको आकर्षण बढेका कारण आयात बढेको हो।

समीक्षा अवधिमा आयात भएका सौन्दर्य प्रसाधनबाट २ अर्ब ५१ करोड रुपैयाँ राजस्व संकलन भएकोमा गत आर्थिक वर्षमा २६ करोड रुपैयाँ बढी अर्थात २ अर्ब ७७ करोड रुपैयाँ राजस्व संकलन भएको तिवारीले जानकारी दिनुभयो।