वीरगन्ज-
जनशक्ति अभावका कारण वीरगन्जको शंकराचार्यद्वारमा रहेको हेल्थ डेस्कबाट हैजा विरुद्धको खोप प्रभावकारी रुपमा वितरण हुन सकेको छैन । वीरगन्जको इनर्वामा अवस्थित हेल्थ डेस्कमा स्थापना गरिएको अस्थायी खोप केन्द्रमा भारतबाट नेपाल प्रवेश गर्ने यात्रुहरुलाई खोप केन्द्रसम्म पुर्याउन आवश्यक जनशक्ति नभएकाले खोप वितरण प्रभावकारी रुपमा हुन नसकेको हो ।
अस्थायी खोप केन्द्रका इन्चार्ज ओमप्रकाश सर्राफले गोप्य खबरसँग कुरा गर्दै बिहानदेखि अपराह्न २ बजेसम्म ७ जनालाई हैजा विरुद्धको खोप खुवाइएको भए पनि रक्सौल नाकाबाट वीरगन्ज प्रवेश गर्ने सवारी साधनलाई रोकी यात्रुलाई खोप केन्द्रसम्म पुर्याउनका लागि आवश्यक सुरक्षाकर्मी तथा जनशक्ति नभएकाले प्रभावकारी रुपमा खोप वितरण हुन नसकेको बताउनुभयो।
यसै विषयमा जन स्वास्थ्य कार्यालयका जन स्वास्थ्य अधिकृत एवम् खोप संयोजक जयमोद ठाकुरसँग बुझ्दा उहाँले खोप अभियान आज बिहानैदेखि जिल्ला भरी एकैचोटी सुरु भएकाले कतिपय स्थानमा जनशक्तिको संयोजनमा सामान्य समस्या देखिएको र यसलाई चाँडै समाधान गरी अभियानलाई अगाडि बढाइने जानकारी दिनुभयो।
