जनकपुर-
नेपाली कांग्रेसका नेता विमलेन्द्र निधिले पूर्वराजा ज्ञानेन्द्र शाहलाई ‘आफ्नो सीमाभित्र बस्न’ चेतावनी दिएका छन्।
जनकपुरधाममा शनिबार भएको एक कार्यक्रममा बोल्दै निधिले नेपालमा राजतन्त्र फर्किने सम्भावना नरहेको बताए। उनले ज्ञानेन्द्र शाहलाई राजतन्त्रको अन्त्य भएका अन्य देशहरूको उदाहरणबाट सिक्न आग्रह गरे।
निधिले भने, “जनताबाट अपदस्थ र अस्वीकृत भइसकेका राजाले आफ्नो सीमा बुझ्नुपर्छ। नेपालमा राजतन्त्र समाप्त भइसकेको छ।” उनले नेपालको गणतन्त्र जनताको समर्थनबाट स्थापित भएको र यसलाई कसैले पनि हल्लाउन नसक्ने दाबी गरे।
उनले पृथ्वीनारायण शाहको योगदानको सम्मान गर्दै राजतन्त्रको पुनर्स्थापनाको कुनै पनि प्रयास असफल हुने बताए। निधिले जनता देशको मालिक भएको र कुनै पनि व्यक्तिले यो भूमिका लिन नसक्ने कुरामा जोड दिए।
