जनकपुर-
प्रधानमन्त्री केपी शर्मा ओलीले आज मधेस प्रदेशसभामा सम्बोधन गर्ने कार्यक्रम तय भएको छ। सबै प्रदेशमा प्रधानमन्त्रीले सम्बोधन गर्ने शृङ्खलाअन्तर्गत उनले आज जनकपुरस्थित मधेस प्रदेशसभामा आफ्नो मन्तव्य राख्नेछन्।
मधेस प्रदेशसभाका सभामुख रामचन्द्र मण्डलका अनुसार, प्रधानमन्त्री ओलीले बिहान ११:३० बजे प्रदेशसभा बैठकलाई सम्बोधन गर्नेछन्। त्यसअघि, उनी बिहान १०:३० बजे हेलिकप्टरमार्फत जनकपुर आइपुग्ने कार्यक्रम छ। जनकपुर विमानस्थलबाट उनी सिधै प्रदेशसभा भवन पुग्नेछन्।
प्रधानमन्त्रीको आगमनलाई मध्यनजर गर्दै प्रदेशसभा सचिवालयले विशेष तयारी गरेको छ। सभा हलमा कार्पेट बिछ्याउने, सभाभवन बाहिर स्वागत गेट निर्माण गर्नेलगायतका कार्यहरू सम्पन्न भएको सचिवालयले जनाएको छ।
प्रदेशसभा सम्बोधनपछि प्रधानमन्त्री ओली सिरहा प्रस्थान गर्ने र त्यहाँ आयोजित आमसभालाई सम्बोधन गर्ने कार्यक्रम रहेको छ। प्रधानमन्त्रीको भ्रमणलाई ध्यानमा राख्दै जनकपुरमा आज सुरक्षा व्यवस्था कडा पारिएको छ।
प्रधानमन्त्रीको सम्बोधनले मधेस प्रदेशका जनतामा उत्साह छाएको छ भने यो भ्रमणले प्रदेशको विकास र समृद्धिका लागि महत्त्वपूर्ण सन्देश दिने अपेक्षा गरिएको छ।
