काठमाडौँ –
बिहानैदेखि नागरिक एपसहित विभिन्न सरकारी वेबसाइटहरू डाउन भएको पाइएको छ। राष्ट्रिय सूचना प्रविधि केन्द्रको विद्युत् आपूर्ति प्रणालीमा खराबी आउँदा बिहान ८ बजेदेखि नै यी सेवाहरू प्रभावित बनेका हुन्।
नागरिक एपका एक अधिकारीले राष्ट्रिय सूचना प्रविधि केन्द्रमा रहेको एकीकृत डेटा सेन्टरको विद्युत् आपूर्ति प्रणालीमा समस्या आएकाले एप सञ्चालनमा नआएको बताए। केन्द्रले आफ्नो विद्युत् प्रणालीअन्तर्गतको लो भोल्टेज प्यानलको अटोमेटिक ट्रान्सफर स्विच (एटीएस) मा खराबी हुँदा विद्युत् आपूर्तिमा व्यवधान आएको जनाएको छ।
सूचना प्रविधि विभागका महानिर्देशक रमेश शर्माले विद्युत् आपूर्तिको समस्या समाधान भइसकेको र सरकारी सिस्टम तथा वेबसाइटहरूलाई नियमित रूपमा सञ्चालनमा ल्याउन तीव्र प्रयास भइरहेको बताए। “हामीले प्राविधिक टोलीसँग मिलेर सिस्टमहरूलाई छिट्टै पूर्ण सञ्चालनमा ल्याउन काम गरिरहेका छौँ,” शर्माले भने।
केन्द्रले यस्ता समस्याहरू भविष्यमा दोहोरिन नदिन प्राविधिक पूर्वाधार सुधारमा जोड दिने योजना बनाएको छ। नागरिकहरूलाई सरकारी सेवामा कुनै असुविधा नहोस् भन्ने उद्देश्यले विभागले तत्काल समाधानका लागि पहल गरिरहेको जनाइएको छ।
