काठमाडौं –
शरीरलाई स्वस्थ राख्न पर्याप्त मात्रामा पानी पिउनु आवश्यक छ। पर्याप्त पानी पिउनाले पाचन प्रणाली स्वस्थ रहन्छ र अनुहारमा चमक पनि आउँछ। तर, शरीरमा पानीको कमी हुनु गम्भीर समस्या हो। पानीको कमीले विभिन्न गम्भीर रोगहरू निम्तिन सक्छ र आन्तरिक अंगहरूलाई हानि पुग्न सक्छ। पानीको कमीले पेट र पाचन प्रणालीसँग सम्बन्धित समस्याहरू पनि निम्तिन सक्छ। यद्यपि, धेरैले अत्यधिक पानी पिउनु पनि लाभदायक ठान्छन्। तर, आवश्यकताभन्दा बढी पानी पिउनाले स्वास्थ्य, विशेष गरी मिर्गौलाको स्वास्थ्यमा कस्तो असर पर्छ भन्ने जानकारीबिना नै मानिसहरूले अत्यधिक पानीको सेवन गर्छन्।
मिर्गौलामा हुन्छ हानि
खाना वा पेय पदार्थमार्फत शरीरमा पुग्ने तत्वहरू अन्तिममा फिल्टर हुन रगतमार्फत मिर्गौलामा पुग्छन्। शरीरमा पुगेको अतिरिक्त पानीलाई पनि मिर्गौलाले फिल्टर गरेर पिसाबको रूपमा बाहिर निकाल्छ। यसले मिर्गौलाको तरल सन्तुलन कायम रहन्छ। तर, मिर्गौलाले आफ्नो क्षमताअनुसार मात्र रगतलाई फिल्टर गर्छ। मिर्गौलामा अत्यधिक दबाब पर्दा यसको क्षमता प्रभावित हुन सक्छ, जसले मिर्गौलाको रोग निम्त्याउन सक्छ।
डाक्टरहरूका अनुसार आवश्यकताभन्दा बढी पानी पिउनाले मिर्गौलाको स्वास्थ्यमा हानि पुग्छ। मिर्गौलाले प्रति घण्टा ०.८ देखि १ लिटर पानी मात्र फिल्टर गर्न सक्छ। यसमा बढी दबाब पर्दा ओभरहाइड्रेशनको अवस्था निम्तिन सक्छ। अत्यधिक पानी पिउनाले रगतमा सोडियमको स्तर कम हुन्छ, जसले इन्टक्सिकेसन वा हाइपोनेट्रेमियाको अवस्था सिर्जना गर्न सक्छ। ओभरहाइड्रेशनले मिर्गौलाको कार्यमा पनि गडबडी हुन सक्छ।
कति पानी पिउने ?
शरीर र मिर्गौलालाई स्वस्थ राख्न दिनभरमा २ देखि ३ लिटर पानी पिउनु पर्याप्त मानिन्छ। यो मात्रा ४ लिटरसम्म पुग्न सक्छ। तर, यसभन्दा बढी पानी पिउनु शरीर र मिर्गौलाको स्वास्थ्यका लागि हानिकारक हुन सक्छ। ओभरहाइड्रेशनका कारण मस्तिष्कलगायत शरीरका अन्य कोशिकाहरूमा सूजन आउन सक्छ। यसले वान्ता, टाउको दुख्ने र कहिलेकाहीं मतिभ्रमको अवस्था पनि निम्त्याउन सक्छ।
