बारा –

कलैया, वैशाख १२, २०८२ – आम जनता पार्टी (आजपा) का अध्यक्ष तथा पूर्वमन्त्री प्रभु साहले मधेसमा भन्सारको नाममा सरकारले लुट मचाएको आरोप लगाएका छन्। बाराको सिम्रौनगढमा शुक्रबार सिम्रौनगढ भन्सार नाका सुचारु गर्न र स्तर वृद्धिका लागि आयोजित विशेष भेलालाई सम्बोधन गर्दै साहले ऐतिहासिक र राजनीतिक विरासत बोकेको सिम्रौनगढ सरकारको विभेदकारी नीतिका कारण ओझेलमा परेको बताए।

साहले भन्सार कानूनमा रहेको ४५ प्रतिशत कमिशनको व्यवस्था रहँदासम्म मधेसमा सरकारी लुटपाट नरोकिने ठोकुवा गरे। उनले प्रधानमन्त्री केपी शर्मा ओलीलाई लक्षित गर्दै प्रश्न गरे, “प्रधानमन्त्रीज्यू, भन्सारको नाममा भइरहेको सरकारी लुटपाट कहिले रोक्नुहुन्छ? सम्पत्तिको हक संवैधानिक हक हो, तर यहाँ तपाईंहरूले लुट मचाउनुभएको छ। हत्यारा र बलात्कारीको सम्पत्ति नखोस्ने, तर भन्सार नबुझाएकै कारण कसैको बुवा–बाजेको सम्पत्ति खोस्ने यो कहाँको न्याय हो?”

उनले सरकारले ठूला व्यापारी र कर छल्नेहरूको सम्पत्ति जफत नगरेको, तर सीमामा साना व्यापारी र सोझासाझा जनताको सम्पत्ति खोस्ने गरेको भन्दै आक्रोश व्यक्त गरे। “ठूलाबडाले आयकर र मूल्य अभिवृद्धि कर छल्छन्, तर उनीहरूको सम्पत्ति जफत हुँदैन। सीमामा दुई किलो नुन वा एक बोरा खाद्य ल्याउनेको साइकल र मोटरसाइकल खोसिन्छ। यो अत्याचार होइन भने के हो? मधेसमा संवैधानिक सम्पत्तिको हक लागू हुँदैन?” साहले सरकारसँग प्रश्न गरे।

सिम्रौनगढमाथि विभेद

साहले सिम्रौनगढको ऐतिहासिक, धार्मिक, पर्यटकीय र सांस्कृतिक महत्त्व हुँदाहुँदै पनि सरकारले यसको विकासमा ध्यान नदिएको बताए। उनले भने, “तराईका सबै जिल्लामा भन्सार कार्यालय छन्, तर बारामा, जहाँ सिम्रौनगढजस्तो राजनीतिक विरासत र औद्योगिक सम्भावना छ, एउटा पनि भन्सार नाका छैन। यो दुर्भाग्य हो। म प्रधानमन्त्रीलाई सोध्छु, बारामा भन्सार कार्यालय कहिले खोल्ने? सिम्रौनगढमाथि किन विभेद?”

सरकारको समृद्धिको नारा भ्रम

साहले वर्तमान सरकारले समृद्धिको नारा दिएर जनतालाई भ्रमित बनाएको टिप्पणी गरे। उनले एमाले र प्रधानमन्त्री ओलीले आफ्नै मतदाताप्रति न्याय नगरेको आरोप लगाए। “एमालेलाई मत दिनेहरू आज पछुताइरहेका छन्। मधेसको लाइफलाइन हुलाकी राजमार्ग ६ लेनको हुनुपर्ने हो, तर यो सरकारले बनाउँदैन। किनभने यो सरकार समृद्ध मधेस देख्न चाहँदैन,” उनले भने।

उनले कलैयाको ३ किलोमिटर सडक कालोपत्रे गर्न नसक्ने सरकारले समृद्ध नेपाल बनाउने कुरा पत्याउन नसकिने बताए। “वडा सदस्य, मेयर, सांसद, मन्त्री, प्रधानमन्त्री सबै एमालेका छन्। प्रदेश र पालिकामा पनि एमालेको सरकार छ। तर, ३ किलोमिटर सडक बनाउन नसक्ने सरकारले समृद्धिको कुरा गर्छ। मतदाता पछुताइरहेका छन्,” साहले थपे।