रक्सौल/ गणेश शंकर
भारत–नेपाल सीमा क्षेत्रमा रहेको रक्सौल–दरभंगा रेल खण्डको कुण्डवा चैनपुर रेलवे स्टेशन नजिकै रेल ट्र्याकको प्याण्डल खोल्दै गरेका दुई मदरसा विद्यार्थीलाई रेलवे प्रोटेक्शन फोर्स (आरपीएफ) ले हिरासतमा लिएको छ। पक्राउ परेका दुवै विद्यार्थी पूर्वी चम्पारणको खरुही गाउँस्थित एक मदरसामा अध्ययनरत रहेको बताइएको छ। घटनाले ट्रेन दुर्घटना गराउने देशविरोधी योजनाको आशंका उब्जाएको छ, जसले सुरक्षा र खुफिया एजेन्सीहरूलाई तनावमा पारेको छ।
प्राप्त जानकारीअनुसार शुक्रवार बिहान करिब ९ बजे कुण्डवा चैनपुर रेलवे स्टेशन नजिकैको रेल ट्र्याक ६ र ७ को बीचमा दुई दर्जन प्याण्डलसहित दुई विद्यार्थीलाई आरपीएफले नियन्त्रणमा लिएको हो। पक्राउ परेका विद्यार्थीहरूमा एकजना अरेराजको हरसिद्धि र अर्का जितना थाना क्षेत्रका बासिन्दा भएको बताइएको छ। रेलवे लाइनका धेरै प्याण्डल खोलिएको अवस्थामा फेला परेका छन्, जसले ट्रेनलाई क्षति पुर्याउने नियतले गरिएको आपराधिक गतिविधिको आशंका बलियो बनाएको छ।
सीमा जागरण मञ्चका कार्यकर्ताहरूलाई यो संदिग्ध गतिविधिको जानकारी प्राप्त भएपछि घटना बाहिर आएको हो। स्रोतका अनुसार, यो कार्यमा अन्य केही नाबालिगहरू पनि संलग्न थिए, जो भाग्न सफल भए। आरपीएफको टोलीले दुई विद्यार्थीलाई प्याण्डलसहित खेदेर नियन्त्रणमा लिएको हो।
भिडियो
पक्राउ परेका विद्यार्थीहरूले प्रारम्भिक बयानमा प्याण्डल पहिल्यै खोलिएको र आफूहरूले ती संकलन गरिरहेको दाबी गरेका छन्। तर, यो दाबीले थप प्रश्नहरू उब्जाएको छ। रेल ट्र्याकको प्याण्डल कसरी खुल्यो? रेल प्रशासनलाई यो कुराको जानकारी किन भएन? कुण्डवा चैनपुर रेलवे स्टेशन नजिकै यस्तो गतिविधि हुँदा पनि रेल प्रशासन कसरी अनविज्ञ रह्यो? यी प्रश्नहरूको जवाफ खोज्न सुरक्षा एजेन्सीहरू सक्रिय भएका छन्।
आरपीएफका सहायक उपनिरीक्षक (एएसआई) सुधीर कुमारले घटनाको गहन अनुसन्धान भइरहेको बताएका छन्। उनले प्याण्डल विद्यार्थीहरूको हातमा कसरी आइपुग्यो र उनीहरूको वास्तविक उद्देश्य के थियो भन्ने पत्ता लगाउन जांच जारी रहेको जानकारी दिए। स्थानीय प्रहरी टोली पनि सक्रिय रूपमा अनुसन्धानमा जुटेको छ।
यो घटनाले रक्सौल–दरभंगा रेल खण्डमा ठूलो दुर्घटना गराउने सम्भावित योजनाको आशंका जन्माएको छ। हालैका महिनाहरूमा भारतका विभिन्न स्थानमा रेल ट्र्याकमा अवरोध सिर्जना गरी दुर्घटना गराउने प्रयासहरू भएका छन्। यो घटनाले पनि यस्तै साजिशको संकेत गरेको छ। सुरक्षा एजेन्सीहरूले यो कार्यमा अन्य व्यक्ति वा समूहको संलग्नता र प्याण्डल खोल्नुको पछाडिको उद्देश्य पत्ता लगाउन गम्भीरतापूर्वक अनुसन्धान थालेका छन्।
यो घटनाले सीमा क्षेत्रमा सुरक्षा व्यवस्थामाथि प्रश्न उठाएको छ। रेल प्रशासन र सुरक्षा निकायहरूले यस्ता गतिविधि रोक्न थप सतर्कता अपनाउनुपर्ने आवश्यकता देखिएको छ।
