काठमाडौँ –
नेपाली काँग्रेसका सभापति शेरबहादुर देउवाले विदेशमा सिकेका ज्ञान र सीपलाई स्वदेशमा प्रयोग गरी देश विकासमा योगदान गर्न प्रवासी नेपालीहरुलाई आग्रह गर्नुभएको छ ।
नेपाली काँग्रेसको जनसम्पर्क विभागले बिहीवार पार्टी केन्द्रिय कार्यालयमा आयोजना गरेको कार्यक्रममा बोल्दै उहाँले यस्तो आग्रह गर्नुभएको हो । उहाँले मुलुक बाहिर रहेर पनि देश र जनताको चासो राखेको भन्दै विभिन्न कामको सिलसिलामा विदेशमा रहेका नेपालीहरुको प्रशंसा गर्नुभयो ।
उहाँले विश्वको जुनसुकै कुनामा रहेपनि नेपालीहरुप्रति सम्मान हुने वातावरण सिर्जना गर्नुपर्ने बताउनु भयो । उहाँले विदेशमा रहेका नेपालीलाई नेपालको वा सम्बन्धित देशको कानूनले पारेको समस्याका बारेमा नयाँ कानून बनाएर समाधान गर्न प्रयास गर्ने बताउनु भयो । उहाँले विदेशमा रहेर नेपाली काँग्रेससँग आवद्य नेपालीहरुलाई पार्टीको महाधिवेशन लगायतका कार्यक्रमहरुमा प्रतिनिधित्व गराएको बताउनु भयो ।
अमेरिका तथा भारतमा रहेका प्रवासी नेपालीलाई पार्टीको केन्द्रिय सदस्यमा प्रतिनिधित्व गराएको भन्दै युरोपलगायत कतिपय छुटेका देशबाट पनि पार्टीमा प्रतिनिधित्व गराउने उहाँको भनाइ छ ।पूर्वप्रधानमन्त्रीसमेत रहनुभएका सभापति देउवाले संघीय लोकतान्त्रिक गणतन्त्रको रक्षका लागि विदेशमा रहेका शिक्षित नेपाली नागरिकले सहयोग गर्नुपर्ने बताउनु भयो ।
