पर्सा-
मधेस प्रदेशका खेलकुद तथा समाज कल्याण मन्त्री प्रमोद जैसवालले पर्साको सखुवा प्रसौनी गाउँपालिका वडा नं. ५ मा मन्दिर पर्खालको शिलान्यास गरेका छन्। शुक्रबार आयोजित समारोहमा मन्त्री जैसवालले स्थानीयको लामो समयदेखिको माग सम्बोधन गर्दै पर्खाल निर्माणको औपचारिक सुरुवात गरे।
मधेस प्रदेश सरकारले मन्त्री जैसवालको पहलमा यो परियोजनाका लागि बजेट विनियोजन गरेको छ। मन्त्रीको सचिवालयका अनुसार, पर्खाल निर्माणले मन्दिर परिसरको संरक्षण गर्नुका साथै विशेषगरी महिलाहरूलाई पूजा–पाठमा सहजता प्रदान गर्नेछ। मन्त्री जैसवालले पूर्वाधार विकासमा अझै धेरै काम गर्न बाँकी रहेको बताउँदै संघीय, प्रदेश र स्थानीय सरकारको समन्वयमा विकासलाई तीव्रता दिनुपर्नेमा जोड दिए।
सखुवा प्रसौनी–५ मा रहेको यो मन्दिर स्थानीय समुदायको आस्थाको केन्द्र हो। पर्खाल नहुँदा मन्दिर परिसर अव्यवस्थित र असुरक्षित रहेको गुनासो थियो। पर्खाल बनेपछि मन्दिरमा पूजा गर्न आउने महिला र बालबालिकालाई सुरक्षित र सहज वातावरण बन्ने स्थानीयको विश्वास छ।
कार्यक्रममा सखुवा प्रसौनी गाउँपालिकाका पूर्वअध्यक्ष प्रदीप जैसवाल, वडा नं. ६ का वडाध्यक्ष मुना कम्कर, वडा नं. ५ का पूर्ववडाध्यक्ष रुपलाल यादव, स्थानीय नेता र बासिन्दाहरूको उपस्थिति थियो। मन्त्री जैसवालले मधेस प्रदेशको समग्र विकासका लागि खेलकुद, सामाजिक कल्याण र पूर्वाधारमा आफ्नो मन्त्रालयले निरन्तर काम गरिरहेको बताए।
पर्खाल निर्माणको काम तत्काल सुरु भएको छ र तोकिएको समयभित्र सम्पन्न गर्ने लक्ष्य छ। सखुवा प्रसौनीमा सडक, खानेपानी र सामुदायिक भवनजस्ता अन्य पूर्वाधार योजनाहरू पनि क्रमशः कार्यान्वयन हुने मन्त्रीको सचिवालयले जनाएको छ। यो परियोजनाले स्थानीयमा उत्साह थपेको छ र मधेस प्रदेश सरकारप्रति जनविश्वास बढ्ने अपेक्षा गरिएको छ।
