काठमाडौं-
पूर्वमन्त्री प्रदीप नेपालको निधन भएको छ ।
लामो समयदेखि पार्किन्सन रोगबाट ग्रसित नेता नेपालको काठमाडौंस्थित नर्भिक अस्पतालमा उपचारका क्रममा मंगलवार दिउँसो निधन भएको हो । उहाँ एमालेको तर्फबाट सूचना तथा सञ्चारमन्त्री समेत बन्नुभएको थियो । स्वास्थ्य समस्याका कारण पछिल्लो समय राजनीतिमा निष्क्रिय नेता नेपालको जन्म विसं २०१० पुस २८ गते भोजपुरको गोगनेमा भएको थियो ।
अहिले नेता नेपाललाई अन्तिम श्रदाञ्जली दिन उपप्रधानमन्त्री प्रकाशमान सिंहलगायत केही नेताहरु नर्भिक अस्पताल पुगेका छन् । नेपाललाई श्रदाञ्जली दिन नर्भिक अस्पताल पुगेका एमाले प्रचार विभाग प्रमुख राजेन्द्र गौतमले बहुआयामिक वामपन्थी नेता गुमाउनुपरेको भन्दै दुःख व्यक्त गर्नुभयो । राजनीतिक पार्टीमा नेता नेपालले गरेको योगदान र भूमिका अतुलनीय र अविस्मरणीय रहेको गौतमको भनाइ छ ।
दिवंगत नेता नेपालले मुलुकको शासकीय सुधारमा महत्वपूर्ण भुमिका खेलेको स्मरण गर्दै गौतमले पार्टीको तर्फबाट श्रदाञ्जली व्यक्त गर्नुभयो ।
