काठमाडौं —
भारत र पाकिस्तानबीच युद्धविराम सम्झौतापछि सोमबार साँझ ५ बजे दुवै देशका सैन्य अभियान निर्देशक (डाइरेक्टर जनरल अफ मिलिट्री अपरेशन्स, डीजीएमओ) बीच वार्ता भएको छ। भारतीय सेना स्रोतका अनुसार, वार्तामा गोलाबारीलगायत कुनै पनि आक्रामक कारबाही नगर्ने र सीमा क्षेत्र तथा अग्रिम मोर्चाबाट सैनिक सङ्ख्या घटाउने विषयमा छलफल भएको छ। दुवै पक्षले यी कदम तुरुन्त चाल्ने सहमति गरेका छन्।
सोमबारै एक पत्रकार सम्मेलनमा भारतीय डीजीएमओ लेफ्टिनेन्ट जनरल राजीव घोईले पाकिस्तानी वायुसेनाले भारतको बहुस्तरीय वायुरक्षा प्रणाली भेद्ने वा भारतीय हवाई अड्डा र लजिस्टिक इन्टेलिजेन्सलाई निशाना बनाउने सम्भावना नरहेको स्पष्ट पारे। उनले भारतको रक्षा प्रणाली पूर्णरूपमा सक्षम रहेको बताए।
यसैबीच, भारतीय सेनाले सोमबार राति जम्मू–कश्मीरको साम्बा क्षेत्रमा केही सन्दिग्ध ड्रोन देखिएको जनाएको छ। यद्यपि, सेनाले यी गतिविधिलाई नियन्त्रणमा राखिएको र युद्धविरामको अवस्था कायम रहेको बताएको छ।
गत अप्रिल २२ मा जम्मू–कश्मीरको पहलगाममा भएको आतङ्कवादी हमलापछि दुवै देशबीच चार दिनसम्म सैन्य तनाव र सङ्घर्ष भएको थियो। भारतले ‘अपरेशन सिन्दूर’ मार्फत पाकिस्तान र पाकिस्तान–अधिकृत कश्मीरमा आतङ्कवादी शिविरमाथि लक्षित हमला गरेको थियो। मे १० मा अमेरिकी मध्यस्थतामा दुवै देशले युद्धविराममा सहमति जनाएका थिए।
यो सहमतिपछि सीमा क्षेत्रमा शान्ति कायम गर्ने प्रयास जारी छ, तर ड्रोन गतिविधिका कारण दुवै पक्ष सतर्क छन्। भारतीय सेनाले कुनै पनि उल्लङ्घनलाई कडाइका साथ जवाफ दिने चेतावनी दिएको छ।
