काठमाडौं –
नेकपा (माओवादी केन्द्र) को भातृ संगठन योङ कम्युनिष्ट लिग (वाइसिएल) को तेस्रो राष्ट्रिय सम्मेलनमा नयाँ नेतृत्व चयनका लागि सहमतिको आधारमा प्रक्रिया अगाडि बढाउन पार्टी नेतृत्वले तीव्र गतिमा प्रयास गरिरहेको छ।
पार्टी अध्यक्ष पुष्पकमल दाहाल ‘प्रचण्ड’ को स्पष्ट निर्देशनपछि नेतृत्व चयन प्रक्रियालाई समावेशी, संगठित र कार्यकर्तामुखी बनाउन सहमतिको खोजीमा गहन परामर्श भइरहेको छ। उपाध्यक्ष अग्निप्रसाद सापकोटाले अध्यक्ष दाहालको धारणा उद्धृत गर्दै नेतृत्व चयनमा सहमति र समावेशीतलाई प्राथमिकता दिइने बताए।
वाइसिएलका निवर्तमान अध्यक्ष सुबोध शेर्पालीले शुक्रबार दिउँसो १ बजेदेखि उम्मेदवारी दर्ता प्रक्रिया सुरु हुने जानकारी दिए। उनका अनुसार अध्यक्ष पदका लागि सुरुमा १३ जना आकांक्षी देखिए पनि हाल यो संख्या घटेर ६ जनामा सीमित भएको छ। ती आकांक्षीहरूबीच सहमति कायम गरी प्रक्रियालाई निष्कर्षमा पुर्याउने तयारी भइरहेको उनले प्रष्ट पारे।
सम्मेलन जेठ २० गते सम्पन्न हुने पूर्वनिर्धारित कार्यतालिका भए पनि नेतृत्व चयन प्रक्रिया जेठ २३ गतेसम्म औपचारिक रूपमा सुरु हुन सकेको छैन। सम्मेलनले २५१ सदस्यीय केन्द्रीय समिति, ३५ सदस्यीय पदाधिकारी समूह र तीनवटा आयोग गठन गर्ने लक्ष्य राखेको छ।
निर्वाचन समितिले उम्मेदवारहरूको नामावली सार्वजनिक गरिसकेको छ। सम्मेलनमा देशभरबाट १,५२२ जना प्रतिनिधि सहभागी छन्। अध्यक्ष पदको दौडमा केहरसिंह कुँवर, पुष्प ओली, कर्म पुलामी, गणेश शाही र नवराज ऐरलगायतका नेताहरूको नाम चर्चामा छ।
प्रारम्भिक चरणमा कुँवरलाई बलियो दाबेदार मानिएको भए पनि पछिल्लो समीकरणले पुष्प ओलीको सम्भावना बलियो देखिएको एक प्रतिनिधिले बताए। तर, कर्म पुलामी, गणेश शाही र नवराज ऐर अझै प्रतिस्पर्धाबाट पछि हट्ने संकेतमा नरहेको अर्का प्रतिनिधिको भनाइ छ।
अन्तिम निर्णय भने अध्यक्ष प्रचण्डको राजनीतिक सन्तुलन, रणनीतिक मूल्याङ्कन र सांगठनिक प्राथमिकतामा आधारित हुने अपेक्षा गरिएको छ। “प्रचण्डले जसलाई समर्थन गर्नुहुन्छ, नेतृत्व त्यही बन्ने सम्भावना बलियो छ,” एक प्रतिनिधिले भने।
खुमलटारस्थित अध्यक्ष निवासमा बिहीबार बिहान बसेको माओवादी पदाधिकारी बैठकमा पनि प्रचण्डले सम्मेलनलाई सहमतिको माध्यमबाट निष्कर्षमा पुर्याउन जोड दिएका थिए। बैठकमा वाइसिएललाई योग्य, ऊर्जाशील र संगठित नेतृत्व हस्तान्तरण गर्न पार्टीले निष्पक्ष र सहजीकरणको भूमिका निर्वाह गर्नुपर्ने निष्कर्ष निकालिएको थियो।
