वीरगन्ज –
ठगी, अपराधिक विश्वासघात र बैङ्किङ कसुरको आरोपमा पक्राउ परेकी पप्पु कन्स्ट्रक्सनकी पूर्व सञ्चालक हरिनारायण रौनियारकी बुहारी श्रुती रौनियारको स्वास्थ्य बिग्रिएपछि अस्पताल भर्ना गरिएको छ। पर्सा प्रहरीमा दर्ता मुद्दामा फरार रहेकी उनलाई काठमाडौँबाट अपराध अनुसन्धान महाशाखाले पक्राउ गरी बिहीबार वीरगन्ज पठाएको थियो।
पर्सा प्रहरीका प्रवक्ता प्रहरी नायब उपरीक्षक किशोर लम्सालका अनुसार, रौनियारलाई पर्सा जिल्ला अदालतमा उपस्थित गराएर थप अनुसन्धानका लागि तीन दिनको म्याद अनुमति प्राप्त भएको छ। उनले दीर्घरोगका कारण स्वास्थ्य अवस्था बिग्रिएको र प्रहरी कार्यालय ल्याउँदा बेहोस हुने अवस्थामा रहेकीले अस्पताल भर्ना गरिएको बताए। यद्यपि, उनको स्वास्थ्य समस्याबारे प्रहरीले विस्तृत जानकारी खुलाएको छैन।
पर्सा प्रहरीमा गत चैत २२ मा दर्ता भएको मुद्दामा रौनियारविरुद्ध धनुषा उपमहानगरपालिका–१ स्थित रमण रविकास ब्रदर्स जेभीले ४ करोड ३२ लाख रुपैयाँ ठगी गरेको जाहेरी दिएको थियो। सोही जाहेरीका आधारमा उनलाई ठगी, अपराधिक विश्वासघात र बैङ्किङ कसुरमा पक्राउ गरिएको हो।
प्रहरीले रौनियारमाथि हिरासतमा राखेर थप अनुसन्धान गरिरहेको छ भने उनको स्वास्थ्य अवस्थाको निगरानी अस्पतालमा भइरहेको छ।
