वीरगन्ज –

वीरगन्ज महानगरपालिकाको आर्थिक वर्ष २०८२/८३ को बजेट प्रस्तुतिका लागि आह्वान गरिएको बोर्ड बैठक वडाध्यक्षहरूको असन्तुष्टिका कारण छलफलमा प्रवेश नगरी स्थगित भएको छ। आइतबार दिउँसो २ बजे प्रमुख प्रशासकीय अधिकृत अरविन्दलाल कर्णको संयोजनमा बोलाइएको बैठकमा वडा नम्बर २ का अध्यक्ष महमद रेयाज मियाकी पत्नीको निधनप्रति शोक प्रस्ताव पारित भएसँगै वडाध्यक्षहरूको विरोध शुरू भएको थियो।

नीति तथा कार्यक्रम, बजेट प्रक्रिया, कार्यविधि र ऐन–नियमावलीका विषयमा छलफल गर्न बोलाइएको बैठकमा वडाध्यक्षहरूले बोर्डका निर्णयको माइन्यूट नदेखाइएको, मनपरी ढंगले विषय थपिएको लगायतका विषयमा तीव्र असन्तुष्टि जनाएका थिए। चर्को आलोचनापछि बैठक असार ३ गतेसम्मका लागि स्थगित गरिएको छ।

स्थानीय सरकार सञ्चालन ऐन र स्थानीय तह आर्थिक कार्यविधि अनुसार आर्थिक वर्ष शुरू हुनुअघि नै नीति तथा कार्यक्रम स्वीकृत भई असार १५ भित्र बजेट पारित भइसक्नुपर्ने प्रावधान छ। तर, वीरगन्ज महानगरपालिकामा विगत ८ महिनादेखि कार्यपालिका बैठक बस्न नसकेको आरोप लाग्दै आएको छ। मधेश प्रदेशको एकमात्र महानगरपालिका भएको वीरगन्जमा नीति र बजेट प्रक्रिया अवरुद्ध हुँदा समग्र विकास योजना प्रभावित हुने भन्दै जनप्रतिनिधिहरूले चिन्ता व्यक्त गरेका छन्।

वडाध्यक्षहरूको असन्तुष्टि र बैठक स्थगित हुने अवस्थाले महानगरको प्रशासनिक र विकास कार्यमा थप जटिलता निम्त्याउने देखिएको छ। असार ३ गते बस्ने बैठकमा सहमति जुटाउन महानगरले विशेष पहल गर्नुपर्ने आवश्यकता देखिएको छ।