ढकालले भिजिट भिसाको नाममा मानव तस्करी गरी लाखौँ युवा ठगिएको विषयमा आन्दोलन गर्दा पनि सरकारले बेवास्ता गरेको गुनासो गरे।

काठमाडौँ –

राष्ट्रिय स्वतन्त्र पार्टी (रास्वपा) का सांसद हरि ढकालले भिजिट भिसा प्रकरण र आफूहरूको आन्दोलनलाई सरकारले नजरअन्दाज गरेको आरोप लगाएका छन्। बिहीबार प्रतिनिधिसभा बैठकमा बोल्दै उनले सरकारले ‘भुइँमान्छे’ को आवाज दबाउन खोजेको र गृहमन्त्री रमेश लेखकले संसद्मा गम्भीर विषयमा कटाक्ष गरेको बताए।

ढकालले भिजिट भिसाको नाममा मानव तस्करी गरी लाखौँ युवा ठगिएको विषयमा आन्दोलन गर्दा पनि सरकारले बेवास्ता गरेको गुनासो गरे। उनले प्रश्न उठाए, “विमानस्थलबाट मानव बेचबिखन ब्युरो किन हटाइयो? सचिवालयका कर्मचारीको सरुवाको जवाफ किन दिइएन?”

रास्वपाले गृहमन्त्रीको राजीनामा र छानबिनका लागि संसदीय समिति वा न्यायिक आयोग गठनको माग राख्दै जेठ १३ गतेदेखि संसद् अवरोध गर्दै आएको छ। तर, सत्तापक्षले समिति गठनको माग अस्वीकार गरेपछि गतिरोध कायमै छ।