सभामुख देवराज घिमिरेले बैठक सुरु गर्नासाथ भिजिट भिसा प्रकरणलाई लिएर रास्वपा र राप्रपाका सांसदहरूले उठेर विरोध जनाएका थिए।

काठमाडौं-

राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले आजको प्रतिनिधिसभा बैठक बहिष्कार गरेका छन्। सभामुख देवराज घिमिरेले बैठक सुरु गर्नासाथ भिजिट भिसा प्रकरणलाई लिएर रास्वपा र राप्रपाका सांसदहरूले उठेर विरोध जनाएका थिए।

सभामुखले सांसदहरूलाई बस्न आग्रह गरे पनि उनीहरूले अटेर गरे। त्यसपछि सभामुखले प्रधानमन्त्रीसँगको प्रश्नोत्तर कार्यक्रम कार्यसूचीबाट हटाएको घोषणा गर्दै मन्त्रालयगत बजेटमाथिको छलफल अघि बढाए। लगत्तै दुवै दलका सांसदहरूले सदन बहिष्कार गर्दै बैठक स्थलबाट बाहिरिए।

आजको बैठकमा प्रधानमन्त्री केपी शर्मा ओलीसँग सांसदहरूको प्रश्नोत्तर कार्यक्रम तय भएको थियो। तर, रास्वपा र राप्रपाले भिजिट भिसा प्रकरणमा गृहमन्त्रीको राजीनामा र छानबिनको माग राख्दै सदन अवरोध गरेका हुन्। यो अवरोधले संसद्को नियमित कार्यसूची प्रभावित भएको छ।