काठमाडौं –

प्रधानमन्त्री केपी शर्मा ओलीले स्पेन भ्रमणबाट फर्केलगत्तै भारत भ्रमण गर्ने तयारीका लागि कूटनीतिक तहमा छलफल सुरु भएको छ। गत वर्ष असार ३१ मा प्रधानमन्त्री नियुक्त भएयता भारत भ्रमणको चर्चा भए पनि हालसम्म यो सम्भव भएको छैन। परराष्ट्र मन्त्रालयका उच्च स्रोतका अनुसार, असार तेस्रो सातापछि भ्रमण तय गर्ने गरी दुवै देशका कूटनीतिक तहमा छलफल भइरहेको छ।

प्रधानमन्त्री ओली असार १५ देखि २० सम्म स्पेनको सेविला सहरमा संयुक्त राष्ट्रसंघले आयोजना गरेको विकासका लागि वित्तपोषण (फाइनान्सिङ फर डेभलपमेन्ट) को चौथो अन्तर्राष्ट्रिय सम्मेलनमा सहभागी हुन जाँदै छन्। नेपाल अति कम विकसित राष्ट्र (एलडिसी) समूहको अध्यक्षको हैसियतले ओलीले उक्त सम्मेलनमा प्रतिनिधित्व गर्नेछन्। भ्रमणमा परराष्ट्रमन्त्री आरजु राणा देउवासहित अन्य सदस्यहरू सहभागी हुने भए पनि टोलीको अन्तिम टुंगो लाग्न बाँकी छ।

‘भारत भ्रमणको विषयमा कूटनीतिक तहमा छलफल भइरहेको छ,’ परराष्ट्र मन्त्रालयका एक उच्च अधिकृतले भने, ‘स्पेनबाट फर्केलगत्तै भ्रमणको तालिका बनाउने तयारी छ।’ यसअघि बिम्स्टेकको छैटौं शिखर सम्मेलनका लागि थाइल्यान्डको बैंककमा भारतीय प्रधानमन्त्री नरेन्द्र मोदीसँग भएको भेटमा भ्रमणको विषयमा छलफल भए पनि मिति टुंगो लाग्न सकेको थिएन।

गत मंसिरमा चीन भ्रमणबाट फर्केका दिन ओलीले भारत भ्रमणको तयारी गर्ने बताएका थिए, तर भारतीय पक्षबाट औपचारिक निम्तो नआउँदा भ्रमण हुन सकेको छैन। पछिल्लो समय पहलगाम घटनापछि नेपालले आतंकवादविरुद्ध भारतलाई समर्थन जनाएपछि दुई देशबीच सम्बन्ध सुधारको चर्चा चलेको छ। परराष्ट्र मन्त्रालय, गृह, अर्थ र उद्योग मन्त्रालयले भ्रमणका क्रममा छलफल, समझदारी र सम्झौताका लागि खाका तयार पारिरहेका छन्। नेपालस्थित भारतीय दूतावास पनि यसको तयारीमा जुटेको स्रोतको दाबी छ।

प्रधानमन्त्री ओली र भारतीय समकक्षी मोदीबीच बैंककमा चैत २२ गते भएको भेटमा भारत भ्रमणको निम्तो प्राप्त भएको दाबी गरिए पनि ठोस प्रगति नभएको परराष्ट्र मन्त्रालय स्रोतले जनाएको छ। ‘असार तेस्रो सातापछि भ्रमणको मिति र एजेन्डा टुंगो लाग्ने सम्भावना छ,’ स्रोतले भन्यो।