काठमाडौं–

आज राष्ट्रिय धान दिवसको अवसरमा राष्ट्रपति भवन शीतल निवासमा विशेष रोपाइँ कार्यक्रम सम्पन्न भएको छ। राष्ट्रपति कार्यालयद्वारा आयोजित यो कार्यक्रममा राष्ट्रपति रामचन्द्र पौडेल र प्रथम महिला सबिता पौडेल सहभागी भए।

रोपाइँको शुभारम्भ गर्दै राष्ट्रपति पौडेलले कृषिलाई आधुनिकीकरण गरी जीवन निर्वाहको आधार मात्र नभएर व्यावसायिक बनाउनुपर्नेमा जोड दिए। उनले कृषि पेसालाई रोजगारीको आधारस्तम्भ बनाउन र कृषकहरूलाई ‘अन्नदाता’का रूपमा सम्मान गर्नुपर्ने बताए। साथै, कृषिलगायत सबै प्रकारका श्रमको सम्मान गर्ने संस्कृतिको विकास र धान उत्पादनमा प्रोत्साहन दिन यो प्रतिकात्मक रोपाइँमा सहभागी भएको उनले उल्लेख गरे।

रोपाइँपछि परम्परागत रूपमा दही–चिउरा खाने कार्यक्रम पनि आयोजना गरिएको थियो। यो कार्यक्रमले नेपाली संस्कृति र कृषिको महत्त्वलाई उजागर गर्दै सामाजिक एकताको सन्देश प्रवाह गरेको छ।