काठमाडौं –

काठमाडौं जिल्ला अदालतको शौचालयबाट हत्कडीसहित फरार भएका चोरी मुद्दाका आरोपित दशरथ शाही उर्फ निराजन ठकुरीलाई प्रहरीले गंगबुबाट पक्राउ गरेको छ। जिल्ला प्रहरी परिसर काठमाडौंका प्रवक्ता प्रहरी उपरीक्षक अपीलराज बोहराका अनुसार, २१ वर्षीय शाहीलाई आइतबार बालाजु बसपार्क क्षेत्रबाट पक्राउ गरिएको हो।

रुकुम पश्चिम, बाँफिकोट गाउँपालिका–१ का बासिन्दा हाल गंगबु बस्ने शाहीलाई २०८२ जेठ २० मा चोरीको आरोपमा पक्राउ गरिएको थियो। उनलाई प्रहरी वृत्त लैनचौरको हिरासतमा राखी अनुसन्धान भइरहेको छ। आइतबार म्याद थपका लागि थुनछेक बहसमा अदालत लगिएको थियो। प्रहरी हवल्दार चक्रबहादुर रोकायाको नेतृत्वमा दुई प्रहरीको जिम्मामा रहेका शाहीले इजलास नम्बर ४ मा बहस चलिरहँदा प्रहरी जवान छविराज रेग्मीसँग शौचालय जाने बहानामा हत्कडीसहित भागेका थिए।

प्रहरीले तत्काल खोजी अभियान चलाएर शाहीलाई गंगबुबाट पक्राउ गरेको हो। उनमाथि चोरी र फरारसम्बन्धी थप कारबाही अघि बढाइने प्रहरीले जनाएको छ।