वीरगन्ज–

धार्मिक सहिष्णुता कायम राख्न र विगतमा हनुमान जयन्तीको समयमा वीरगन्जको छपकैयामा भएको झडपजस्ता घटना दोहोरिन नदिन स्थानीय सरकार र सुरक्षा निकायहरू गम्भीर देखिएका छन्। मुस्लिम समुदायको पवित्र पर्व ताजिया (दाहा) लाई शान्तिपूर्ण रूपमा सम्पन्न गर्न वीरगन्ज महानगरपालिकाले कडा सुरक्षा व्यवस्था र नियमहरू लागू गरेको छ।

यस्तो छ ६ बुँदे निर्णय
वीरगन्ज महानगरपालिकाका मेयर राजेशमान सिंहको अध्यक्षतामा बसेको बैठकमा पर्साका प्रमुख जिल्ला अधिकारी गणेश अर्याल, जिल्ला प्रहरी कार्यालय पर्साका प्रहरी उपरीक्षक गौतम मिश्रा, सशस्त्र प्रहरी १३ गण वीरगन्जका सशस्त्र प्रहरी उपरीक्षक राधेश्याम धिमाल, राष्ट्रिय अनुसन्धान पर्साका प्रमुख सन्तोष ढुंगेल र मुस्लिम समुदायका अगुवाहरूको उपस्थितिमा निम्न निर्णयहरू गरिएका छन्:
१. ताजिया व्यवस्थापन: वीरगन्जका विभिन्न वडाबाट निकालिने ताजियालाई घण्टाघरमा जम्मा हुने व्यवस्था गरिनेछ।
२. समन्वय टोली: प्रत्येक वडाबाट ताजिया निकाल्ने समूहले समन्वय टोली गठन गरी असार २० गतेभित्र जिल्ला प्रशासन कार्यालयमा जानकारी उपलब्ध गराउनुपर्नेछ।
३. हातहतियार र डीजे निषेध: ताजिया जुलुसमा हातहतियार र डीजेको प्रयोग पूर्ण रूपमा निषेध गरिएको छ।
४. बालबालिकाको सहभागिता निषेध: ताजियामा बालबालिकालाई सहभागी गराउन पाइने छैन।
५. जनस्वास्थ्यमा असर नपर्ने: जनस्वास्थ्यमा प्रतिकूल असर पार्ने कुनै पनि गतिविधि गर्न निषेध गरिएको छ।
६. अनुगमन समिति: मेयर राजेशमान सिंहको संयोजकत्वमा मुस्लिम समुदायबाट एक जना र सुरक्षा निकायका प्रमुखहरू सम्मिलित अनुगमन समिति गठन गरिनेछ। कार्यक्रमको सम्पूर्ण सुरक्षा स्थानीय प्रहरी प्रशासनले गर्नेछ।

धार्मिक सौहार्द्र कायम राख्ने प्रतिबद्धता
विगतमा हनुमान जयन्तीको जुलुसका क्रममा भएको झडपले धार्मिक सौहार्द्रमा खलल पुगेको घटनाबाट पाठ सिक्दै स्थानीय प्रशासन र महानगरपालिकाले ताजिया पर्वलाई शान्तिपूर्ण बनाउन विशेष जोड दिएका छन्। मेयर सिंहले धार्मिक सहिष्णुता र सामाजिक एकता कायम राख्न सबै समुदायलाई सहयोग गर्न आग्रह गरेका छन्।

यो निर्णयले वीरगन्जमा धार्मिक पर्वहरू शान्तिपूर्ण र सुरक्षित रूपमा सम्पन्न हुने अपेक्षा गरिएको छ।