गणेश शंकर/रक्सौल-

भारत-नेपाल सीमामा रहेको रक्सौलको मैत्री पुलमा सशस्त्र सीमा बल (एसएसबी) को ४७औं बटालियनले शुक्रबार एक बंगलादेशी नागरिकलाई पक्राउ गरेको छ। पक्राउ परेका व्यक्तिको पहिचान अहमद सैयद इकबालको रूपमा भएको छ, जसका पिता सैयद सफिकुर रहमान हुन्। भारतीय खुफिया विभागका अनुसार, इकबाल २२ जूनमा नेपाल प्रवेश गरेको थियो र उनीसहित आधा दर्जन संदिग्ध व्यक्तिहरू रक्सौल आसपासका क्षेत्रमा आतंकी गतिविधिको रेकी गर्न सक्रिय रहेको आशंका गरिएको छ।

‘अपरेशन सिन्धुर’ पछि भारत-नेपाल सीमामा सुरक्षा व्यवस्था कडा पारिएको छ। भारतीय सुरक्षा एजेंसीहरूले विगत डेढ महिनामा रक्सौल सीमाबाट करिब एक दर्जन विदेशी नागरिकहरूलाई अवैध घुसपैठको प्रयासमा पक्राउ गरिसकेका छन्, जसमा बंगलादेशी र चिनियाँ नागरिकहरू समेत सामेल छन्। भातीय सुरक्षा श्रोतका अनुसार, मधेश प्रदेशको विभिन्न क्षेत्रमा बंगलादेशी र पाकिस्तानी नागरिकहरू आतंकी घटना गर्न सीमा क्षेत्रको रेकी गरिरहेका छन्।

एसएसबीका कमान्डेन्ट गंगा सिंह उदावतले बताएअनुसार, सीमामा २४ घण्टा निगरानी र सघन जाँच जारी छ। नक्कली आधार कार्ड र अन्य जाली दस्तावेजहरूको जाँचका लागि हाईटेक स्क्यानरहरू तैनाथ गरिएको छ। इकबालको गिरफ्तारीले भारत-नेपाल सीमाको सुरक्षा चुनौतीलाई फेरि एकपटक उजागर गरेको छ। उनको साथबाट नेपाली मुद्रा पनि बरामद गरिएको छ, र उनी ढाकाबाट काठमाडौं हुँदै रक्सौलमार्फत भारत प्रवेश गर्न खोजिरहेको प्रारम्भिक अनुसन्धानमा खुलासा भएको छ।

स्थानीय सुरक्षा एजेंसीहरूले मधेश प्रदेश र सीमावर्ती क्षेत्रमा संदिग्ध गतिविधिहरूमा कडा नजर राखिरहेका छन्। यो घटनाले दुवै देशका सुरक्षा निकायहरूबीच थप समन्वय र सतर्कताको आवश्यकता देखाएको छ।