काठमाडौँ-

नेपालमा कोभिड–१९ को संक्रमण पुनः बढ्दै गएको छ। स्वास्थ्य तथा जनसङ्ख्या मन्त्रालयका अनुसार २०८१ पुस १७ गतेदेखि २०८२ असार १९ गतेसम्म नेपालका ३१ जिल्लामा कोभिड–१९ को सङ्क्रमण पुष्टि भएको छ। हालसम्म २४९ जनामा कोरोना सङ्क्रमण देखिएको छ, जसमध्ये पछिल्लो एक हप्तामा ३५ नयाँ सङ्क्रमित थपिएका छन्। पछिल्लो २४ घण्टामा थप तीन जनामा सङ्क्रमण पुष्टि भएको छ भने एक जनाको मृत्यु भएको छ।

स्वास्थ्य मन्त्रालयको ईपिडिमियोलोजी तथा रोग नियन्त्रण महाशाखा (इडिसिडी) का अनुसार, सङ्क्रमणको जोखिमलाई मध्यनजर गर्दै देशभरका १७ सीमा नाकामा रहेका हेल्थ डेस्कहरूमा कोभिड–१९ को निगरानीलाई थप प्रभावकारी बनाइएको छ। मन्त्रालयका प्रवक्ता डा. प्रकाश बुढाथोकीले भने, “सबै सीमा नाकाका हेल्थ डेस्कमा आरडिटी विधिबाट कोभिड–१९ को परीक्षण भइरहेको छ।”

कोभिड–१९ लगायत श्वास–प्रश्वासबाट सर्ने सङ्क्रामक रोगहरूबाट बच्न मास्कको प्रयोग, साबुन–पानीले हात धुने, स्यानिटाइजरको प्रयोग, र व्यक्तिगत सरसफाइमा ध्यान दिन मन्त्रालयले अनुरोध गरेको छ। डा. बुढाथोकीले कोभिड–१९ प्रभावित क्षेत्रबाट आएका वा सङ्क्रमणसँग मिल्दोजुल्दा लक्षण देखिएका व्यक्तिहरूलाई ‘सेल्फ क्वारेन्टाइन वा आइसोलेसन’मा बस्न आग्रह गरेका छन्।

मधेश प्रदेशको वीरगन्ज र रक्सौल जस्ता सीमावर्ती क्षेत्रमा पनि हेल्थ डेस्कहरू मार्फत कडा निगरानी र परीक्षण भइरहेको छ। सङ्क्रमण फैलिन नदिन स्थानीय प्रशासन र स्वास्थ्य निकायहरूले समन्वयात्मक रूपमा काम गरिरहेका छन्। मन्त्रालयले सङ्क्रमणको अवस्था नजिकबाट अनुगमन गरिरहेको र आवश्यक स्वास्थ्य सावधानी अपनाउन सबैलाई अपिल गरेको छ।