काठमाडौँ –

श्रम, रोजगार तथा सामाजिक सुरक्षा मन्त्रालयको गाडी दुरुपयोग भएको र हराएको भनिएको गाडी पुनः भेटिएको समाचार सार्वजनिक भएपछि नेपाल सरकारले यस विषयमा गम्भीर चासो व्यक्त गरेको छ। आइतबार प्रधानमन्त्री तथा मन्त्रिपरिषद्को कार्यालयले सबै मन्त्रालय, आयोग, बोर्ड, समिति, निकाय तथा मातहतका कार्यालयहरूलाई सवारी साधनको विस्तृत विवरण पठाउन निर्देशन जारी गरेको छ।

प्रधानमन्त्री कार्यालयले गरेको परिपत्रमा भनिएको छ, “सवारी साधनको नाममा दर्ता रहेका तथा हस्तान्तरण भई प्रयोगमा रहेका सबै सवारी साधनहरू (दुई पाङ्ग्रे वा चार पाङ्ग्रे) को विवरण प्रयोग गरिरहेका अधिकृत वा कर्मचारीको नाम र पदसहित टेबुलको ढाँचामा तयार गरी उपलब्ध गराउन अनुरोध गरिन्छ।”

सचिव गोविन्दबहादुर कार्कीले हस्ताक्षर गरेको उक्त परिपत्रमा सवारी साधनको प्रकार, नम्बर, प्रयोगकर्ताको नाम, पद, र प्रयोगको स्थायित्व (कसरी प्रयोग भइरहेको छ) जस्ता विवरणहरू स्पष्ट रूपमा पठाउन सबै निकायलाई निर्देश दिइएको छ। यो विवरण सात दिनभित्र पठाउनुपर्ने उल्लेख छ।

यस प्रकरणको अनुसन्धान र निगरानीका लागि राष्ट्रिय सतर्कता केन्द्रलाई समेत जानकारी गराइएको छ। श्रम मन्त्रालयको महिन्द्रा स्कोर्पियो (प्रदेश ३–०१–००२ झ ५३६७) गाडी हराएको भनिएको घटनाले व्यापक चर्चा पाएपछि सरकारले सवारी साधनको दुरुपयोग रोक्न र पारदर्शिता कायम गर्न यो कदम चालेको हो।

यो निर्देशनले सरकारी सवारी साधनको प्रयोगमा अनधिकृत गतिविधि र दुरुपयोगलाई नियन्त्रण गर्ने अपेक्षा गरिएको छ।