| ♠ समाचार सारांश | ♠ एआईबाट जेनरेटेड |
|
सिन्धुली –
सिन्धुलीका एक युवकलाई भारत पुर्याएर मिर्गौला निकालिएको घटना सार्वजनिक भएको छ। पीडित दुधौली नगरपालिका–१ का ३२ वर्षीय खिलबहादुर भुजेल हुन्।
प्रहरीका अनुसार भुजेललाई रोजगारी दिने प्रलोभन देखाएर काठमाडौँबाट भारत लगिएको थियो। प्रारम्भिक अनुसन्धानमा उनलाई सुनौली नाका हुँदै भारत लगिएको र साउन ९ गते मिर्गौला निकालिएको खुलेको छ।
घटनामा संलग्न रहेको आरोपमा नुवाकोटका समीर परियारलाई मानव बेचबिखन अनुसन्धान ब्युरोले पक्राउ गरेको छ। उनी एक व्यक्तिको मिर्गौला तस्करी गराएर ५० हजार रुपैयाँ कमिसन लिने गरेको प्रारम्भिक अनुसन्धानमा खुलेको छ।
भाइ मानबहादुर भुजेलका अनुसार, पीडितलाई कीर्तिपुरमा स्वास्थ्य परीक्षण गराई विभिन्न स्थानमा खाजा र मदिरा खुवाएर सुनौली नाका हुँदै भारत लगिएको थियो।
साउन १० गते काठमाडौँको कलंकीस्थित सडक पेटीमा बेहोस अवस्थामा भेटिएका भुजेललाई साथीको सहयोगमा सिन्धुली फर्काइएको थियो।
पेट दुखेपछि अस्पताल पुर्याइएका भुजेलको डकाहास्थित समिट माउन्टेन अस्पतालमा गरिएको भिडियो एक्सरेमा देब्रेतिरको मिर्गौला नरहेको पुष्टि भएको हो। चिकित्सकका अनुसार उनको शरीरमा ३० वटा टाँका लगाइएको देखिएको छ।
भुजेल परिवारले सोमबार स्थानीय प्रहरीमा उजुरी दिएका छन्। उजुरीपछि सिन्धुली प्रहरीले पीडितको घरमै पुगेर बयान लिएको छ।
मानव बेचबिखन अनुसन्धान ब्युरोले घटनाको अनुसन्धान जारी राखेको छ। प्रहरीका अनुसार भुजेलसँगै अन्य ५ जना व्यक्तिलाई पनि भारत लगिएको आशंका गरिएको छ।
