राजविराज –

जनता समाजवादी पार्टी नेपालका अध्यक्ष उपेन्द्र यादवले वर्तमान सरकारको भ्रष्ट, नस्लीय र विभेदपूर्ण चरित्रका कारण देश उल्टो गतितर्फ अघि बढिरहेको आरोप लगाएका छन्। बुधबार सप्तरीको राजविराजमा आयोजित जसपा नेपाल जिल्ला कार्यसमितिको शपथग्रहण तथा पदभार कार्यक्रममा बोल्दै पूर्वउपप्रधानमन्त्रीसमेत रहेका यादवले जनतामा व्यापक निराशा र आक्रोश बढेकोले जुनसुकै बेला विद्रोह भड्किन सक्ने चेतावनी दिए।

उनले सरकारमाथि एकल जातीय वर्चस्व कायम गरी तानाशाही प्रवृत्ति देखाएको, भ्रष्टाचार, कुशासन र विभेद चरम सिमामा पुगेको आरोप लगाए। साथै, लोकतन्त्रमा जनसंख्याको आधारमा प्रतिनिधित्व र बजेट विनियोजन हुनुपर्ने भए पनि राष्ट्रियसभामा मधेशको प्रतिनिधित्व न्यून रहेको उनले औंल्याए। यादवले रणनीतिअन्तर्गत मधेशलाई टुक्र्याइएको र संविधानमै उल्लेखित स्वायत्त मधेशको व्यवस्था कार्यान्वयन नगरेको आरोप पनि लगाए।

परिवर्तनका लागि संघर्ष अपरिहार्य रहेको भन्दै अध्यक्ष यादवले पार्टी नेता–कार्यकर्तालाई संगठन विस्तार, सामाजिक न्याय र अधिकारका लागि सक्रिय रूपमा काम गर्न निर्देशन दिए। उनले वडा, टोल र बस्तीस्तरमा सभा–बैठक गरी जनचेतना बढाउन आग्रह गरे।

कार्यक्रममा मधेश प्रदेश सभा सदस्य अनिरुद्ध प्रसाद यादवले राजगढ गाउँपालिकामा होनहार युवा लालु यादवको प्रहरी दमनमा मृत्यु भएको भन्दै दोषी प्रहरीमाथि कडा कारबाहीको माग गरे। कार्यक्रममा केन्द्रीय सदस्य विकास तिवारी, शैलेन्द्र मोहन झा, अमरनाथ मण्डल, गीता यादवलगायत नेताहरूले सम्बोधन गरे भने, सो अवसरमा नवनिर्वाचित जसपा सप्तरी अध्यक्ष केदार यादवले पार्टी सुदृढिकरणमा कुनै कमी नगर्ने प्रतिवद्धता जनाए। साथै, अवकाशप्राप्त इन्जिनियर योगेन्द्र प्रसाद यादव जसपा नेपालमा प्रवेश गरे।