पर्सा/मधेस खबर —

यसवर्ष पर्सा जिल्लामा कालाजारको पहिलो बिरामी भेटिएको छ। वीरगन्ज महानगरपालिका–२७, उदयपुरघुर्मीका ४० वर्षीय पुरुषमा कालाजारको संक्रमण पुष्टि भएको स्वास्थ्य कार्यालय पर्साले जनाएको छ।

स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार, गत आर्थिक वर्षमा जिल्लामा कालाजारको संक्रमण केवल एक जनामा मात्रै भेटिएको थियो। चालु आर्थिक वर्षको पहिलो महिनामा भेटिएको यो केसले स्वास्थ्य अधिकारीहरूलाई सतर्क बनाएको छ।

संक्रमित पुरुष केही समयअघि रोजगारीको सिलसिलामा भारतको गुजरात पुगेका थिए। त्यहाँ उनलाई साँझको समयमा पटक–पटक ज्वरो आउने लगायत लक्षण देखा परेपछि घर फर्किएका थिए। साउन ८ गते उनी वीरगन्ज–१५ स्थित तराई हस्पिटल पुगेका थिए, जहाँ परीक्षणमा कालाजारको संक्रमण पुष्टि भएको हो। त्यसपछि स्वास्थ्य कार्यालय पर्सा र वीरगन्ज महानगरपालिकाका स्वास्थ्यकर्मीको टोलीले पुनः परीक्षण गरी संक्रमण पुष्टि गरेको छ।

आर्थिक अवस्था कमजोर भएका ती पुरुषको उपचारमा आवश्यक सुई र औषधि प्रादेशिक स्वास्थ्य आपूर्ति व्यवस्थापन केन्द्र जनकपुरबाट उपलब्ध गराइएको छ। हाल उनी घरबाटै उपचार गराइरहेका छन् र स्वास्थ्य अवस्था सामान्य रहेको जनाइएको छ।

स्वास्थ्य कार्यालयले स्थानीय तहसँग समन्वय गर्दै कालाजार, मलेरिया, डेंगी जस्ता कीटजन्य रोगको रोकथाम र नियन्त्रणका लागि जनचेतनामूलक कार्यक्रम सञ्चालन गरिरहेको छ।

कालाजारलाई अंग्रेजीमा Visceral Leishmaniasis, Black Fever वा Dumdum Fever पनि भनिन्छ। यो रोग Sand Fly (भुसुनाको टोकाइ) मार्फत सर्छ र समयमै उपचार नगरे प्रायः मृत्यु हुने जोखिम हुन्छ। मुख्य लक्षणहरूमा पटक–पटक ज्वरो आउनु, तौल घट्नु, थकान, रक्तअल्पता र कलेजो तथा पित्तथैलीको आकारमा वृद्धि पर्नु समावेश छन्।

हालसम्म कालाजारबाट बच्ने खोप वा औषधि उपलब्ध छैन। संक्रमणबाट बच्न शरीरका धेरै भाग छोप्ने कपडा लगाउने, झ्याल–ढोकामा जाली राख्ने, कीरा मार्ने विषादी छर्कने, सुत्दा झुल प्रयोग गर्ने जस्ता उपाय अपनाउन स्वास्थ्यकर्मीहरूले सिफारिस गरेका छन्।