वीरगन्ज-
झाडा पखाला र वान्ताका कारण पर्सा जिल्लामा पछिल्लो २४ घण्टाभित्र तीन जना युवाको मृत्यु भएको छ । पर्साको पोखरिया नगरपालिका र वीरगन्ज महानगरपालिका निवासीमध्ये एक महिला सहित दुई जना पुरुषको मृत्यु भएको हो ।
झाडा पखाला र वान्ताबाट पीडित पोखरिया–९ निवासी १९ वर्षीया युवतीको वीरगन्ज हेल्थ केयर अस्पतालमा मृत्यु भएको छ भने वीरगन्ज–१६ निवासी ३७ वर्षीय पुरुषको नारायणी अस्पतालमा र मुर्ली निवासी २२ वर्षीय युवाको तराई अस्पतालमा मृत्यु भएको हो ।
नारायणी अस्पतालका सूचना अधिकारी डा. उदयनारायण सिंहका अनुसार नारायणी अस्पतालमा झाडा पखाला ले भर्ना भयका बिरामी मध्य,हाल सम्म ८ जना को परिक्षण गर्दा,५ जानामा हैजा पुष्ठि भएको बताए । उनले शुक्रबार साँझ उपचारका लागि नगवाबाट ल्याइएका युवाको उपचारकै क्रममा मृत्यु भएको बताए ।
एकै दिनको झाडा पखालाबाट मृत्यु हुनु अस्वाभाविक भएकोले अन्य बिरामीको मल परीक्षणमा अस्पताल लागेको र हैजाको महामारी हुनसक्ने आशंका गरिएको डा. सिंहले बताए । उनका अनुसार पर्साको पोखरिया र वीरगन्ज महानगरपालिकाका विभिन्न वडामा हैजाको संक्रमण फैलिएको पुष्टी समेत भइसकेको छ । तराई अस्पतालमा भर्ना भएका तीन जना बिरामीमा हैजाको जीवाणु भेटिएको उनको भनाइ छ ।
हाल झाडा पखाला र वान्ताबाट पीडित २५ भन्दा बढी बिरामी नारायणी अस्पतालमा भर्ना रहेका छन् । शय्या अभावका कारण नयाँ आउने बिरामीलाई अन्य अस्पतालमा रेफर गर्नुपरेको डा. सिंहले जानकारी दिए ।
यस्तै, पोखरियाबाट उपचारका लागि आएकी १९ वर्षीया युवतीको शुक्रबार नै मृत्यु भएको वीरगन्ज हेल्थ केयर अस्पतालका सञ्चालक डा. अबुलहैस अंसारीले जानकारी दिए । एक दिनमै झाडा पखालाबाट युवतीको मृत्यु हुनु अस्वाभाविक भएको भन्दै उनले यसलाई हैजा भएको दाबी गरे । उनका अनुसार उक्त अस्पतालको आइसियुमा अहिले ८ जना बिरामी भर्ना छन्, जसको स्वास्थ्य अवस्था गम्भीर रहेको छ ।
उनले पछिल्लो १० दिनयता पोखरिया र वीरगन्जका विभिन्न वडाबाट झाडा पखालाका गम्भीर प्रकृतिका बिरामी अस्पतालमा भर्ना हुँदै आएको बताए ।
वीरगन्जको तराई अस्पतालमा भर्ना भएका तीन जना बिरामीको मल परीक्षणमा हैजाको जीवाणु भेटिएको अस्पतालले जनाएको छ ।
पर्सा जिल्लामा झाडा पखालाका बिरामी बढ्दै गएपछि जनमानसमा त्रास फैलिएको छ । यसलाई नियन्त्रण गर्न वीरगन्ज महानगरपालिकाको स्वास्थ्य महाशाखाले पहल थालेको छ । शुक्रबार रातिदेखि नै मुर्ली र नगवामा स्वास्थ्यकर्मीको टोली परिचालन गरिएको छ भने अस्पतालमा भर्ना भएका बिरामीको उपचारमा समेत सहयोग गरिरहेको महानगरपालिकाका प्रमुख प्रशासकीय अधिकृत अरविन्दलाल कर्णले जानकारी दिए ।
पानीबाट फैलिने हैजाबाट बच्न पानी उमालेर मात्रै पिउन तथा सुरक्षित पानी प्रयोग गर्न चिकित्सकहरूले आग्रह गरेका छन् । झाडा पखाला वा वान्ता भएमा नजिकैको स्वास्थ्य संस्थामा तुरुन्तै जान र बिरामीलाई जीवनजल तथा झोलिला पदार्थ बढीभन्दा बढी खान/खुवाउन समेत सुझाव दिएका छन् ।
