वीरगन्ज-
वीरगन्जमा हैजाको सङ्क्रमण तीव्र गतिमा बढ्दै ११४ जनामा पुष्टि भएको छ ।
स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार मंगलबार रातिसम्म ११४ जना हैजा संक्रमित भेटिएका हुन् ।
यससँगै वीरगन्जका विभिन्न अस्पतालमा झाडापखालाका कारण उपचाररत बिरामीको सङ्ख्या ४२२ पुगेको छ । तीमध्ये २२३ जना उपचारपछि डिस्चार्ज भइसकेका छन् ।
महानगरपालिकाले दूषित खानेपानीलाई प्रमुख कारण मानेर पानीको नमुना संकलन गरी परीक्षण सुरु गरेको छ । राष्ट्रिय जनस्वास्थ्य प्रयोगशाला, काठमाडौंमा परीक्षण गरिएको १० मध्ये ८ वटा नमुनामा हैजा पुष्टि भएको छ भने बाँकी दुईको रिपोर्ट आउन बाँकी छ ।
सङ्क्रमण फैलिन थालेपछि वीरगञ्ज महानगरपालिकाले मातहतका सबै विद्यालय थप तीन दिनका लागि बन्द गर्ने निर्णय गरेको छ । विद्यालयका शिक्षक तथा कर्मचारीलाई हैजा नियन्त्रणसम्बन्धी जनचेतनामूलक कार्यक्रम सञ्चालन गर्न आग्रह गरिएको छ ।
यता, चिकित्सकहरूले सुरक्षित पानी उमालेर मात्र पिउन, खुला शौच नगर्न र व्यक्तिगत सरसफाइमा विशेष ध्यान दिन सर्वसाधारणलाई आग्रह गरेका छन् ।
