वीरगन्ज-
वीरगन्जमा झाडापखाला र हैजा फैलिँदै जाँदा पर्सामा एक महिला सहित दुई पुरुषको ज्यान गुमाएको समाचार गोप्यखबरले प्रसारण गरेको थियो । तर, वीरगन्ज महानगरपालिका र जिल्ला जनस्वास्थ्य कार्यालय पर्साका एक जना अधिकारी तथा महानगर समर्थित केही मिडियाले उक्त समाचारलाई झुटा र अफवाह भन्दै निरन्तर आम जनतालाई भ्रमित गर्न प्रयास गरेका थिए ।
तर अन्ततः प्रतिनिधिसभाको (आज) शुक्रबारको बैठकलाई सम्बोधन गर्दै प्रधानमन्त्री केपी शर्मा ओलीले हालसम्म ६२४ जनामा हैजा संक्रमण पुष्टि भएको र तीमध्ये ४३७ जना निको भइसकेको जानकारी दिए । उनले मृतकमाथि श्रद्धाञ्जली अर्पण गर्दै सरकारको तर्फबाट सक्दो पहल भइरहेको स्पष्ट पारे ।
प्रधानमन्त्री ओलीले भने,
“यतिबेला वीरगन्जमा हैजाको महामारी आएको छ । यसले पीडा र क्षतिको वातावरण सिर्जना गरेको छ । अहिलेसम्म तीन जनाको मृत्यु भएको छ । सरकारको तर्फबाट स्वास्थ्य मन्त्रालयको समन्वयमा नेपाली सेनासहित चारवटै सुरक्षा निकायका चिकित्सक र उपकरणको परिचालन तथा प्रयोग गरिनेछ । साथै, रोगको वास्तविक स्रोत पत्ता लगाउन खोजी भइरहेको छ ।”
उनले हैजाको उपचारका लागि नारायणी अस्पतालमा निःशुल्क सेवा उपलब्ध गराइएको र निजी अस्पतालमा समेत उपचार भइरहेको जानकारी दिए । साथै, सचेतनामूलक कार्यक्रम सञ्चालन गरी रोग नियन्त्रणमा चाँडै सफलता मिल्ने विश्वास समेत व्यक्त गरे ।
यसअघि वीरगन्जमा तीन जनाको मृत्यु भएको घटनाबारे गोप्यखबरले समाचार प्रकाशित गरेपछि महानगर समर्थित केही केही मिडिया र स्वास्थ्य कार्यालयका एक जना अधिकारीले त्यसलाई खण्डन गर्ने प्रयास गरेका थिए । तर, प्रधानमन्त्रीकै सम्बोधनपछि वीरगन्जमा हैजा संक्रमण र मृत्युसम्बन्धी तथ्य सार्वजनिक भएको छ । यद्यपि मृत्यु भएकोबारेमा वीरगन्ज महानगरपालिका वा जिल्ला जनस्वास्थ्य कार्यालय पर्साबाट कुनै आधिकारिक जानकारी दिइएको छैन
गोप्यखबरले आफ्नो पत्रकारितामा सत्य, स्पष्ट र जिम्मेवारीलाई सधैं प्राथमिकतामा राख्ने, कुनै दबाब वा प्रभाव बिना जनतालाई जानकारी दिने प्रतिवद्धता दोहोर्याउँछ ।
