वीरगन्ज-
गृहमन्त्री रमेश लेखकले बारा पर्सामा देखा परेको हैजालाई राज्यको सम्पूर्ण स्रोत परिचालन गरेर भएपनि नियन्त्रणमा ल्याइ छाडिने अठोट व्यक्त गर्नुभयो । उहाँले सुरक्षाका तीन वटै अंगमा रहेका चिकित्सक तथा विज्ञहरुलाई परिचालन गरेर भएपनि हैजाको महामारीलाई यथासिघ्र नियन्त्रणमा ल्याइने बताउनुभयो।
नेपाली कांग्रेस आपूर्ति तथा उपभोक्ता विभागले आइतबार वीरगन्जमा आयोजना गरेको दैनिक उपभोग्य वस्तुको सुनिश्चितता, उपभोक्ताको अधिकार हाम्रा चासो विषयक अन्तरक्रिया कार्यक्रममा सम्बोधन गर्दै गृहमन्त्री लेखकले वीरगन्ज र यस आसपासका क्षेत्रमा देखा परेको हैजाको संक्रमण केबाट फैलिएको हो, त्यसको स्रोत सरकारले पत्ता लगाएरै छाड्ने बताउनुभयो।
महामारीको रुपमा बदलिएको हैजा फैलिनमा कहाँ चुक भएको हो, त्यसको खोज नीति सरकारले गर्ने र त्यसका लागि आवश्यक भए विज्ञहरुको टोली समेत सरकारले परिचालन गर्न सकिने उहाँले जानकारी दिनुभयो ।
वीरगन्जमा देखिएको जलसंकटलाई सम्बोधन गर्न सरकारले डिप बोरिङ मार्फत सर्वसाधारणलाई पानी वितरण गर्दा भएका कमी कमजोरीको सरकारले समीक्षा गर्ने जानकारी दिदै मन्त्री लेखकले हैजाको प्रकोप नियन्त्रणमा कुनै कमी सरकारले बाँकी नराख्ने प्रतिबद्धता व्यक्त गर्नुभयो ।
सभालाई सम्बोधन गर्दै मन्त्री लेखकले लोकतन्त्र र गणतन्त्रको विकल्प अन्य कुनै तन्त्र हुनै नसक्ने र लोकतन्त्र मासिए मुलुकमा समाधान हुनै नसक्ने द्वन्द्वको सुरुवात हुने खतरा रहेको बताए।
पछिल्लो सात दशकमा ७ वटा संविधान नेपालमा फेरिएको बताउँदै उहाँले अहिलेको संविधानलाई समाप्त गरिए कहिल्यै समाप्त नहुने द्वन्द्वमा मुलुक फस्ने जोखिम भएकाले संविधानको रक्षाका लागि सबैले पहल लिन आवश्यक रहेको विचार व्यक्त गर्नुभयो।
कार्यक्रममा नेपाल सरकार कानुन तथा न्याय मन्त्री अजय चौरसियाले संविधान र लोकतन्त्रलाई कमजोर पार्नेलाई कानुनी दायरामा ल्याउन ऐन निर्माण गर्ने तयारीमा सरकार रहेको जानकारी दिनुभयो। उहाँले हजारौँको बलिदान र सात दशकको संघर्षबाट प्राप्त भएको संघीय लोकतान्त्रिक समावेशिता सहितको संविधानलाई जलाउने, त्यसको अपमान गर्नेलाई कार्यवाही गर्न कानुन निर्माण भइरहेको बताउनुभयो।
उद्योगी व्यवसायीको प्रतिष्ठालाई जोगाउन र व्यापारमैत्री वातावरण मुलुकमा निर्माण गर्न सरकारले देवानी मुद्दामा अग्रिम जमानतको प्रावधान कानुनमै राख्ने तयारीमा लागेको कानुन मन्त्री चौरसियाले जानकारी दिनुभयो। उहाँले उद्योगी व्यवसायीलाई आफू पक्राउ पर्न सक्ने सम्भावना रहेका महसुस भएपछि अदालतबाट पक्राउ पर्नु अघि नै अग्रिम जमानत लिन सकिने कानुनमा व्यवस्था गर्न लागिएको र त्यसको मसौदा निर्माणको क्रममा रहेको बताउनुभयो।
उपभोक्ता विभागका अध्यक्ष फूलकुमार लालवानीको अध्यक्षतामा सम्पन्न कार्यक्रमलाई नेपाली कांग्रेसका महामन्त्री एवम् पूर्व गृहमन्त्री कृष्ण प्रसाद सिटौलाले लोकतन्त्र प्राप्तिका लागि नेपालमा भएका राजनीतिक संघर्षबारे आम नेपाली जनतालाई जानकारी दिन आवश्यक रहेको विचार व्यक्त गर्नुभयो।
उहाँले नेपालमा केही भएन भन्नेहरुलाई जवाफ दिन र आम नागरिकलाई भएका विकास कार्यबारे जानकारी दिंदै संघर्षबारे प्रचार–प्रसार गर्न आवश्यक रहेको बताउनुभयो।
दुई दशक अगाडीसम्म नेपालको अधिकांश क्षेत्रमा मोटरबाटो नरहेको र जनताले भोग्दै आएको पीडाबारे आम जनतालाई जानकारी दिँदै पछिल्लो २० वर्षमा भएका विकास कार्यबारे आम जनतालाई जागरूक बनाउन आवश्यक रहेको नेता सिटौलाले जानकारी दिनुभयो ।
उहाँले नेपालमा भएका सम्पूर्ण परिवर्तनको नेतृत्व नेपाली कांग्रेसले नै गरेको र कांग्रेसकै नेतृत्वमा समृद्धि सम्भव भएकाले कांग्रेसले केही गरेको छैन भनी जनमानसमा भ्रम फैलाउने काम भएकाले सोबाट जोगिन सबैलाई अपिल गर्नुभयो। कांग्रेसलाई कमजोर पार्न सकिए मुलुकमा रहेको लोकतन्त्र, गणतन्त्रलाई समाप्त पार्न सकिने भएकाले कांग्रेसविरुद्ध दुष्प्रचार गरी लोकतन्त्र समाप्त पार्ने खेल मुलुकमा भइरहेको नेता सिटौलाले बताउनुभयो।
कार्यक्रममा सहभागीहरूले किसानले भोगिरहेको रासायनिक मल तथा पानीको समस्या बारे गुनासो गर्दै हाल देखिएको समस्यालाई समाप्त पार्न सरकारलाई आग्रह गरेका थिए। सहभागीहरूले उपभोक्ता ऐनलाई बलियो बनाउँदै मुलुकमा विद्यमान आर्थिक दण्डहीनतालाई अन्त्य गर्न अपिल गरेका थिए।
