वीरगन्ज-
खानेपानी मन्त्री प्रदीप यादव र वीरगन्ज महानगरपालिकाका मेयर राजेशमान सिंहलाई फोनमार्फत ज्यान मार्ने धम्की दिएको आरोपमा पक्राउ परेकी किरण साहमाथि प्रहरीले तीनवटा मुद्दा दर्ता गरेको छ।
पर्सा प्रहरीका प्रवक्ता एवम् डीएसपी किशोर लम्सालका अनुसार मन्त्री यादवका स्वकीय सचिव हरिन्द्र साहले दिएको जाहेरीका आधारमा किरणविरुद्ध मुद्दा प्रक्रिया अगाडि बढाइएको हो ।
साहमाथि विद्युतीय कारोबारसम्बन्धी अपराध, संघीय सांसदलाई ज्यान मार्ने धम्की दिने कसुर र अफवाह फैलाउने कसुर अन्तर्गत मुद्दा दर्ता प्रक्रिया अगाडि बढाइएको प्रवक्ता लम्सालले जानकारी दिनुभयो।
तीनवटै मुद्दामा पर्सा जिल्ला अदालतबाट साहमाथि तीन दिनको म्याद थप गरिएको प्रहरीको भनाइ छ।
शनिबारदेखि प्रहरी हिरासतमा रहेकी साहलाई म्याद थप भइसकेपछि जिल्ला प्रहरी कार्यालय पर्साको हिरासतमा राखी आवश्यक अनुसन्धान अघि बढाइएको प्रहरीले जनाएको छ।
