वीरगन्ज-
जेनजी पर्सा समूहले बैंकिङ क्षेत्रभित्र देखिएका भनिएका अनियमितता, पदको दुरुपयोग र पारिवारिक प्रभावका विषयमा निष्पक्ष छानबिनको माग गर्दै सोमबार प्रमुख जिल्ला अधिकारी भोला दहाललाई ज्ञापनपत्र बुझाएको छ।
समूहले प्रभु बैंक (पूर्व सेन्चुरी बैंक) भित्र राजनीतिक पहुँच र पारिवारिक प्रभावका कारण अस्वाभाविक कर्जा स्वीकृति र पदोन्नति प्रक्रियामा अनियमितता भएको आरोप लगाएको छ। साथै, कर्जा नतिर्ने उद्देश्यले पारिवारिक सम्बन्ध तोडिएकोजस्ता घटनाले आर्थिक नैतिकता र जवाफदेहितामाथि प्रश्न उठाएको उल्लेख गरिएको छ।
ज्ञापनपत्रमा पाँच बुँदे माग राखिएको छ —
१️.स्वतन्त्र छानबिन समिति गठन गर्न,
२️⃣. बैंकका कर्जा फाइल र निर्णय सार्वजनिक गर्न,
३️.राजनीतिक र पारिवारिक दबाब अन्त्य गर्न,
४️.दोषीमाथि कानुनी कारबाही गर्न, र
५️.सर्वसाधारण ग्राहकका हकहितको रक्षा गर्न।
ज्ञापनपत्र बुझाउने क्रममा जेनजी समूहका प्रतिनिधिहरूले भने,
“बैंक र वित्तीय संस्था जनताको विश्वासमा टिकेका निकाय हुन्। त्यहाँ हुने अनियमितता र पहुँचको दुरुपयोगले सार्वजनिक आस्थामाथि ठेस पुर्याउँछ, त्यसैले निष्पक्ष छानबिन आवश्यक छ।”
प्रमुख जिल्ला अधिकारी दहालले ज्ञापनपत्र ग्रहण गर्दै उक्त विषयमा आवश्यक प्रक्रिया अघि बढाइने आश्वासन दिएका छन्।
