वीरगन्ज –
नेपाल–भारत खुला सीमाको बढ्दो दुरुपयोग, अवैध घुसपैठ, मानव तस्करी र सङ्गठित अपराध तत्काल रोक्नुपर्ने माग गर्दै वीरगन्जका दर्जनौँ जेन–जी युवाहरू आइतबार सडकमा उत्रिएका छन् ।
युवाहरूले जिल्ला प्रशासन कार्यालय पर्सामा प्रमुख जिल्ला अधिकारी भोला दाहाललाई ज्ञापनपत्र बुझाउँदै खुला सीमालाई अपराधीहरूको ‘सेफ पासेज’ बनाउन नदिन कडा निगरानीको माग गरेका छन् । ज्ञापनको बोधार्थ प्रधानमन्त्री कार्यालय र गृह मन्त्रालयलाई पनि पठाइएको छ ।
ज्ञापनमा उल्लेख गरिएका मुख्य मागहरू :
– सबै सीमावर्ती नाकामा परिचयपत्र जाँच्ने ‘प्रमाणीकरण कक्ष’ स्थापना गर्ने
– सिसिटिभी, ड्रोन र डिजिटल निगरानी प्रणाली जडान गर्ने
– नेपाल–भारत संयुक्त गस्ती नियमित गर्ने
– मानव तस्करी तथा घुसपैठमा ‘शून्य सहनशीलता’ नीति लागू गर्ने
– विशेष तस्करी विरोधी अभियान तत्काल सञ्चालन गर्ने
“आगामी निर्वाचन नजिकिँदै गर्दा यस्ता जोखिम झन् बढ्न सक्छन्,” ज्ञापनमा भनिएको छ, “राष्ट्रिय सुरक्षा र सामाजिक सद्भावमाथि गम्भीर खतरा देखिएको छ ।”
भारतको पश्चिम बङ्गालमा मतदाता सूचीको गहन पुनरीक्षण (स्पेसल इन्टेन्सिभ रिभिजन) सुरु भएपछि वर्षौँदेखि लुकिछिपी बसेका बङ्गलादेशी तथा रोहिंग्या नागरिकहरू नेपालतर्फ धकेलिने जोखिम बढेको युवाहरूको चिन्ता छ ।
यसअघि झापाको काँकडभिट्टा–पानीटंकी नाकामा सन् २०२५ को जनवरीदेखि अक्टोबरसम्म मात्र भारतीय सशस्त्र सीमा बल (एसएसबी) ले ३७ जना बङ्गलादेशी नागरिकलाई पक्राउ गरिसकेको भारतीय सञ्चारमाध्यमले जनाएका छन् । तर नेपालतर्फ परिचयपत्र जाँचको कुनै व्यवस्था नहुँदा घुसपैठ झन् सहज बनेको सुरक्षा विज्ञहरू बताउँछन् ।
प्रमुख जिल्ला अधिकारी भोला दाहालले युवाहरूको चिन्ता जायज रहेको स्वीकार गर्दै उठाइएका सुझाव सम्बन्धित निकायमा पठाउने र निरन्तर काम भइरहेको प्रतिबद्धता जनाएका छन् ।
