जनकपुर-
मधेश प्रदेशका मुख्यमन्त्री सरोजकुमार यादवविरुद्ध ७४ जना प्रदेशसभा सदस्यले दायर गरेको रिटमा सर्वोच्च अदालतले (आज ) सोमबार पुनः बहस तोकेको छ।
सो मुद्दामा विपक्षी (मुख्यमन्त्री पक्ष) का तीनजना कानुन व्यवसायीले बहस गर्न बाँकी रहेको छ। उनीहरूको बहस सकेपछि सोही दिन फैसला हुने सम्भावना रहेको जसपा नेपालका प्रवक्ता मनिष सुमनले बताए।
सर्वोच्च अदालतले यसअघि नै अन्तरिम आदेश जारी गर्दै मुख्यमन्त्री यादवलाई नीतिगत तथा दीर्घकालीन असर पार्ने कुनै निर्णय नगर्न निर्देशन दिएको छ। मुद्दालाई अग्राधिकार दिइएको छ।
मुख्यमन्त्री यादवले संविधानको धारा १६८ को उपधारा (३) अनुसार आफू नियुक्त भएको दाबी गरेका छन् भने रिट दायर गर्ने सात दलीय गठबन्धनका सांसदहरूले उपधारा (२) अनुसार बहुमतको दाबी पेश गर्दा पनि प्रदेश प्रमुखले बेवास्ता गरी असंवैधानिक रूपमा यादवलाई नियुक्त गरेको आरोप लगाएका छन्।
दुवै पक्षका कानुन व्यवसायीहरूले आफ्नो तर्क प्रस्तुत गरिसकेका छन्। (आज) सोमबारको बहसपछि मुद्दाको अन्तिम टुंगो लाग्ने अपेक्षा गरिएको छ।
