जनकपुरधाम-
जनकपुरधाममा रहस्यमय मृत्यु भएकी रोशनी झा मृत्यु प्रकरणको अनुसन्धानले गम्भीर मोड लिएको छ। नेपाल प्रहरीको केन्द्रीय अनुसन्धान ब्यूरो (सीआईबी) ले घटनाको अनुसन्धानको जिम्मा लिएलगत्तै धनुषा प्रहरीले रोशनीका श्रीमान् पक्षका थप दुई जनालाई नियन्त्रणमा लिएको छ।
पक्राउ पर्नेहरूमा जनकपुरधाम वडा नम्बर ३, देवान पोखरी क्षेत्रका ४५ वर्षीय सचिन झा र उनका १५ वर्षीय छोरा प्रतीक झा रहेका छन्। जिल्ला प्रहरी कार्यालय धनुषाका प्रवक्ता प्रहरी नायब उपरीक्षक गणेश बहादुर बमले पक्राउ परेका दुवै व्यक्ति मृतक रोशनी झाका यसअघि नै पक्राउ परेका श्रीमान् प्रशान्त मिश्रका भिनाजु र भान्जा रहेको पुष्टि गरे।
दाइजोको विवाद र शंकास्पद मृत्युको सिलसिला
जनकपुरधाम उपमहानगरपालिका-४, कटैया चौरी घर भएका प्रशान्त मिश्र (जो मधेश प्रदेशको नीति तथा योजना आयोगमा शाखा अधिकृत पदमा कार्यरत छन्) की श्रीमती रोशनी झाको मंसिर १२ गते बिहीबार राति शंकास्पद रूपमा मृत्यु भएको थियो।
रोशनीका माइती पक्षले यो मृत्युलाई साधारण नभई योजनाबद्ध हत्या भएको दाबी गर्दै आएका छन्। न्यायको मागसहित विभिन्न चरणको आन्दोलन गर्दै आएका माइती पक्षले श्रीमान् प्रशान्त मिश्रले विवाहपश्चात् पटकपटक दाइजोका नाममा रकम र सामान माग्दै आएको दाबी गरेका छन्। माइती पक्षले विवाहका क्रममा ९ लाख रुपैयाँ दिएको र पछि घर निर्माणका लागि पुनः १५ लाख रुपैयाँ रकम दिएको समेत जनाएका छन्।
शंका बढाउने व्यवहार र विरोधाभास
मृत्यु प्रकरणमा शंका उत्पन्न गर्ने केही गतिविधिहरू सार्वजनिक भएका छन्। मृतकका श्रीमान् प्रशान्त मिश्रले रोशनीको मृत्युको कारणबारे पटकपटक झुण्डिएको र भर्याङबाट लडेको जस्ता विरोधाभासपूर्ण अभिव्यक्तिहरू दिएका थिए। साथै, घटनापछि रोशनीका कागजातहरू जलाउने जस्ता कार्यहरू गरिएकाले मृत्यु प्रकरण झन् शंकास्पद बनेको माइती पक्षको भनाइ छ।
प्रहरीले घटनाको संवेदनशीलतालाई मध्यनजर गर्दै पहिले नै मुख्य आरोपित श्रीमान् प्रशान्त मिश्रलाई नियन्त्रणमा लिएको थियो। सीआईबीले आफ्नो विशिष्ट तरिकाले घटनाको सूक्ष्म अनुसन्धान थालेपछि प्रशान्तका भिनाजु र भान्जालाई समेत नियन्त्रणमा लिनुले अनुसन्धानको दायरा फराकिलो भएको देखिएको छ। मृतक रोशनीका दुई नाबालक सन्तान छन्।
