वीरगन्ज-
वीरगन्जको मुख्य बसपार्कस्थित भानु चोकमा रहेको एक लजमा आइतबार बिहान एक भारतीय दम्पती झुन्डिएको अवस्थामा मृत फेला परेका छन् । बसपार्कको ‘नवदुर्गा लज’ मा विगत तीन दिनदेखि बस्दै आएका दम्पती आफ्नै कोठाभित्र मृत भेटिएपछि स्थानीय क्षेत्रमा सनसनी फैलिएको छ ।
जिल्ला प्रहरी कार्यालय पर्साका अनुसार करिब ४० वर्षीय पुरुष र ३५ वर्षीया महिला लजको कोठाभित्र झुन्डिएको अवस्थामा फेला परेका हुन् । लज सञ्चालकले कोठाभित्र शंकास्पद अवस्थामा देखेपछि तुरुन्तै प्रहरीलाई खबर गरेका थिए । सूचना पाउनेबित्तिकै घटनास्थल पुगेको प्रहरी टोलीले मुचुल्का उठाएर शव बरामद गरेको हो ।
मृतकहरू भारतीय नागरिक भएको बुझिए पनि उनीहरूको नाम र स्थायी ठेगाना खुल्न नसकेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डिएसपी) हरि बहादुर बस्नेतले जानकारी दिनुभयो । “शव पोस्टमार्टमका लागि नारायणी अस्पताल पठाइएको छ र मृतकको पहिचान खुलाउने प्रयास भइरहेको छ,” डिएसपी बस्नेतले भन्नुभयो ।
ती दम्पतीले किन यस्तो कदम चाले वा घटनाको पछाडि अन्य कुनै कारण छ भन्नेबारे प्रहरीले गम्भीरताका साथ अनुसन्धान सुरु गरेको छ । लजमा राखिएको विवरण (इन्ट्री बुक) र उनीहरूसँग भएका कागजातका आधारमा पहिचान गर्ने काम भइरहेको प्रहरीको भनाइ छ ।
