काठमाडौँ –
लुम्बिनी प्रदेशकी सांसद रेखा शर्मा अन्ततः बालश्रम शोषणको आरोपमा पक्राउ परेकी छन्। केही वर्षअघि आफ्नै घरबाट एक बालिका उद्धार गरिएको घटनाले पुनः कानुनी रूप लिएपछि आइतबार राति उनलाई धुम्बाराहीस्थित निवासबाटै नियन्त्रणमा लिइएको हो।
उपत्यका अपराध अनुसन्धान कार्यालयको टोलीले मध्यरात नजिकै सञ्चालन गरेको अपरेशनमा उनी पक्राउ परेकी हुन्। उक्त घटनाले पुनः राजनीतिक वृत्तमा तरंग ल्याएको छ।
नेपाल कम्युनिष्ट पार्टी (एमाले) बाट निर्वाचित सांसद शर्मामाथि नाबालिकालाई घरेलु काममा लगाई बालबालिकाविरुद्धको गम्भीर कसुर गरेको आरोप छ। यसअघि काठमाडौं महानगरपालिका ले उनको घरबाट ती बालिकाको उद्धार गरेपछि यो प्रकरण सार्वजनिक भएको थियो।
प्रहरीले बालबालिका सम्बन्धी ऐनअन्तर्गत मुद्दा अघि बढाउँदै विस्तृत अनुसन्धान सुरु गरेको जनाएको छ। पुरानो घटना फेरि बल्झिएसँगै सांसद शर्माको कानुनी यात्रा अब कता मोडिन्छ भन्ने चासो व्यापक बनेको छ।
