वीरगन्ज–
नेशनल मेडिकल कलेज तथा शिक्षण अस्पताल, वीरगन्जमा एम्बुलेन्स चालकहरूका लागि आधारभूत जीवनरक्षा (Basic Life Support-BLS) सम्बन्धी विशेष तालिम सफलतापूर्वक सम्पन्न भएको छ। GTA Foundation को सहकार्यमा आयोजित उक्त तालिममा ३४ जना एम्बुलेन्स चालकहरूको सक्रिय सहभागिता रहेको थियो।
अस्पताल पुग्नुअघि प्रदान गरिने आकस्मिक स्वास्थ्य सेवालाई थप प्रभावकारी बनाउने उद्देश्यले मंगलबार बिहान ९:३० देखि १२:३० बजेसम्म कलेजको सभाहलमा तालिम सञ्चालन गरिएको हो। GTA Foundation द्वारा सञ्चालन भइरहेको “नेपालमा एम्बुलेन्स चालकहरूका लागि चरणबद्ध आधारभूत जीवनरक्षा तालिमको प्रभावकारिता” सम्बन्धी अध्ययनअन्तर्गत यो कार्यक्रम आयोजना गरिएको जनाइएको छ।
तालिमका क्रममा सहभागीहरूलाई आकस्मिक अवस्थामा बिरामीको प्रारम्भिक मूल्याङ्कन, हृदय–फोक्सो पुनर्जीवन (CPR), प्राथमिक उपचारका विधि तथा जीवनरक्षासम्बन्धी विभिन्न व्यावहारिक सीपहरू सिकाइएको थियो। तालिम पूरा गरेका चालकहरूलाई प्रमाणपत्रसमेत वितरण गरिएको छ।
कलेजका अस्पताल निर्देशक डा. इशरत जहानको नेतृत्वमा सम्पन्न कार्यक्रममा GTA Foundation का तर्फबाट इन्टरभेन्सन तथा अनुसन्धान विकास अधिकृत एवं प्रशिक्षक ललिता अवाल, अनुसन्धान सहायकहरू रुबी श्रेष्ठ र ललिता कुँवरको उपस्थिति थियो। साथै BLS-ToT तालिमप्राप्त नर्सिङ इन्चार्जद्वय गोमा के.सी. र दुर्गा चापागाईंले पनि प्रशिक्षणमा सहजीकरण गर्नुभएको थियो।
आकस्मिक स्वास्थ्य सेवाको पहिलो सम्पर्क बिन्दुका रूपमा रहेका एम्बुलेन्स चालकहरूको क्षमता अभिवृद्धिले बिरामीको सुरक्षित स्थानान्तरण र समुदायस्तरमा स्वास्थ्य सेवाको गुणस्तर बढाउन ठूलो योगदान पुग्ने विश्वास आयोजकले व्यक्त गरेका छन्।
